طريقة ملتوية لتوظيف الوافدين بالواسطة!

Posted: 13 مارس 2009 in الحياة حلوة

 

في تدوينات سابقة تحدثت عن توظيف المواطنين وفرص العمل ومعارض التوظيف من ناحية سلبياتها وايجابياتها وتبعاتها.

لكن هذه المرة ساتحدث عن موضة التوظيف الجديدة للغير مواطنين التي يقوم بها الاجانب باسلوب متحايل على سياسة التوطين!

منذ دخولي في سلك العمل في القطاع الحكومي وكنت الاحظ امرا يحصل خلال فترة الصيف بالتحديد!!! وفي كل سنة تقريبا !!

تعرفون خلال فترة الصيف تكثر اجازات الموظفين وللاسف كثير من الاقسام والادارات يقولون ان عندهم نقص في عدد الموظفين خلال الصيف بالرغم من علمهم المسبق بتواريخ اجازات موظفينهم ويتم وضع الجداول وتوزيع العمل على هذا الاساس، المهم …. السنه هاي وقبل الصيف اقترحت ان يتم الاستعانه ببنات الجامعه الي يدورون على العمل الصيفي ،،، ويشتغلون ويانا في تخليص المعاملات الادارية السهلة ،،،منها يتعلمون ويقضون وقتهم وفرصه ان نعرف الكفاءات منهم عسب نستفيد منهم وانييبهم عندنا في حال تخرجهم ورغبتهم في الانضمام الينا ،،،،

لاقت الفكرة على استحسان كثير من المسؤولين والتاكيد على ان هذا ماسيتم القيام يه ؟؟؟ ولكن

عندما اتا الصيف ماشفت حد من عيال البلاد !! للاسف اجانب !! ويوم سالت قالولي هذيلا الي يايبينهم شؤون الموظفين ،،،بس عسب الصيف لنقص الموظفين بعقود لمدة شهرين عن طريق مكاتب توظيف وبعدها يسيرون؟؟؟ ضحكت وسرت عنهم ،،،،،!!

 خلال الشهرين يكون هل موظفين عبارة عن خلية نحل !!! اي ورقه واي معامله يتابعوها ويخلصوها في ثواني !!! وكلمات الادب والاحترام والابتسامات ،،،شي مب طبيعي ،،،حتى احد الموظفين قالي ماشالله الي يابينها شغوله وطيبه ،،،،قتله بترياك اتييني عقب الصيف وتعطيني رايك مرة ثانية !!؟

طبعا وكما توقعت وظفوهم بشكل دائم وثبتوهم وبدرجات حلوة بعد (وللمواطنين ماشي شواغر) ،،،المهم نفس الموظفة والموظف سارلهم ربيعي العزيز  من كمن يوم ،،،،حتى مب ان عنده اوراق ادارية يبيهم يخلصونها؟؟ لا بس بيسألهم شفتو فلان ،،،تدرون شو ردو !!! مب شغلنا !!!؟ قالهم بس اسالكم عن شخص مب اطلب منكم تسوون شي !!! هل موظفين الي يايبينهم قسما بالله ولا معامله يالسين ينجزونها !!!!!! كل معامله او ورقه الجواب الي يجيهم مب شغلنا مع انه شغلهم !! غير التسيب الي يصير طبعا !!؟ وهل شي سمعته من اكثر من شخص

لازم هل امور يوقفونها طريقة التوظيف الملتوية للاجانب خصوصا اذا وظيفة ليست معقده ومجرد اعمال ادارية وتخليص اوراق ،،،يعني اشخاص يعرفونهم ويجيبونهم عن طريق مكاتب توظيف لمدة شهرين ويبلطون في المكان ،،،وياليت لو ان شغلهم او اداءهم جيد ،،،صدقوني اقل من الجيد ،،،حتى الان افضل الادريين الي شفتهم صدقوني مواطنين باستثناء يمكن حالة واحده اعترف بكفاءتها وامانتها،،،

شباب وبنات البلاد اولى بهل وظايف ،،،اذا الوظايف البسيطه مب قادرين نوظف عيالنا فيها ،،،الامور الكبيرة كيف بيمسكونها !! برايي في كل جهة اول ادارة لازم يتم فيه توطين كامل هم شؤون الموظفين ،،،لانهم بوابة الدخول وبوابة الخروج !!!

Advertisements
تعليقات
  1. حاجوني كتب:

    هييييييييييهااااا . . .

    عاد ما ندري نضحك على حالنا ولا نبكيها .. كلامك سليم …

    تدري انا استغرب يوم يقولون ماشي شواغر .. ياخوك نحن المواطنين كلنا على بعضنا مانوصل مليون .. شيل منهم كبار السن .. والأطفال واللي يدرسون في المدارس .. اللي تبقوا هم اللي يبحثون عن وظايف .. وهم

    كنت اتمنى يسوون احصائية عن عدد المواطنين البطالية >> شرات اخوك <<

    ترا كل سنة عن سنة النسبة تزيد .. ونحن في خبر كان ..

    بخصوص مسؤول شؤون الموظفين .. او مسؤولة توظيف المواطنين .. لو كانت هي او هو بروحه مب مواطن شو تتوقع يكون ؟؟

    هيه صح كما توقعت بيوظفون ابناء جلدتهم على حساب المواطنين ..

    اذكر واحد من ربعي ..راح يقدم على شركة شبه حكومية في دبي .. ومسؤولة توظيف المواطنين كانت وحدة اجنبية .. وكانت شكلها ما تبغي توظف ربيعي .. ربيعي اترياهم واترياهم .. كل يوم يمر عليهم .. اليوم باجر واليوم باجر .. لين ما دخل عالمدير وكلمهم وطفربهم .. بعدين قبلوه ..

    على فكرة هالمؤسسة عدد المواطنين فيها تقدر تعدها على اصابع ايدينك وانت تاكل كتكات للاسف ..

    وهالمؤسسة صارت فيها سرقات لأموال بالملايين الدراهم .. ولا حسيب ولا رقيب ..والسبة .. الأجانب اللي فيها ..

    والله أهل البلاد صدقني هم أولى وأولى وأولى من هالاجانب بمليارات المرات …

    والله تعرف شو تقول وشو تخلي .. مانقول غير .. حسبنا الله ونعم الوكيل ..

  2. سالم الامــارات كتب:

    حاجوني

    ان شالله الامور بتتعدل جدام يا صديقي البركة في الاجيال اليديدة

    تفاءل صديقي

    تيك كير

  3. حاجوني كتب:

    أفا عليك.. ما توصي حريص .. الحمدلله متفائلين دااااااااايماً ^^ ..

    بس نتدارس الأمور ونشوف أحوال أهالينا وأخواننا …

    التفاؤل مطلوب .. ونحن هني بس نتناقل الاخبار باللي حاصل لنا حالياً .. ومب شرط يستمر ..<< بشرط يكون هناك توجه ونية بالتغيير .. أما تركها كما هي .. لن يتغير شي ..

    ولازلنا متفائلين ^__^

  4. اقصوصه كتب:

    اممممممممممم

    قايلتلك انا

    احنا اولى

    جان قدمت السي في مالي عندكم

    بدل ما انا بطاليه جيه

    بس شقول

    تسيتاهلون

    خخخخخخخخخخخخخخخ

  5. سالم الامــارات كتب:

    اقصوصه

    انا شو دخلني !!! الحمدالله ان ماخلي حواي الا عيال البلاد غير جي مافي لول

    بس انا منقهر ومب عايبني هل نوع من الالاعيب عبتلهم مانعرف ،،،بس الصيف الياي ،،،،، صدقيني ماراح افوتها
    ودي السيفي شركة مساندة في البلدية،،،يبون ناس
    سيري مابتندمين !!
    تيك كير اقصوصه

  6. المخلصه كتب:

    سوري هالمره (( لا تعليق )) >> أظن تعرف السبب

    تقبل مروري

  7. Hot Chocolate كتب:

    أمور كثيرة تحتاج إلى إعادة النظر فيها خصوصا المؤسسات الحكومية
    و العتب مش على الموظفين العتب على اللي ماسكين مناصب في المؤسسات وساكتين و العتب الأكبر على اللي يغطون على أصحاب هالمناصب و يزينون صورهم أمام العالم عن طريق وسائل الاعلام

  8. سالم الامــارات كتب:

    المخلصة

    سلااااام عليكم
    الله حلاته هالاسم لول

    صدقتي ،،،اعرف السبب ،،،،، لكن الامل على الله مخلصة سالم لول
    وتسلميلي ع تواجدج الدائم والمستمر
    تيك كير

  9. سالم الامــارات كتب:

    Hot Chocolate

    المشكلة الظاهرة الي ذكرتها بدت بالانتشار مب بس في الجهات الحكوميو وبس ،،لا حى في الشبة حكومي ،،،ووظايف جد عادية ،،،حتى الثانوية العامة يقدرون يسووونها،،،

    المهم ان نعرف هل اشياء ونحاول مانخليها تصير اذا لنا سلطة فيها

    حياج الله شوكوليت ،،،وترى انا من جد زعلان
    سي يا

  10. رحيل كتب:

    للأسف الشديد كلامك صحيح، وأزيدك من الشعر أبيات، في كذا موضة لتوظيف المواطنين…

    في عملي السابق كانوا يسوون مقابلات للمواطنات اللي عندهن الثانوية عسب يكونن موظفات استقبال، ويعينونهن بدرجة سابعة… عقب يدربونهن و يعرضون عليهن أماكن أحسن أونه درجة سابعة ليفل أعلى شوي، بينما لو وظفوا مواطنا بالمؤهلات المطلوبة للوظايف اللي دربوا هاييل عليهت عالأقل يكونن في آخر السادسة أو الخامسة … والوافدين يوظفونهم على أحسن درجات… خليها على الله.

    وايد القصص في مجال الاحتيال على النظام، بس شو نسوي، الله لا يبارك فيهم ولا يسامحهم .

  11. سالم الامــارات كتب:

    رحيل

    اتفق وياج تماما ،،،هاي قصه ثانية الي تتم فيها توظيف المواطنين بدرجات دنيا ،،،ويتم البحث اكثر شي عن الي ماعندهم شهادات لانهم يعرفون ان ممكن يرضون باي شي ،،،، وحتى اذا يابوهم ،،محلك سر !!! غير انهم اونه وصلو نسبة التوطين المطلوبه !!!

    الصيف يجب ان تتم الاستعانه بطلاب الصيفي ،،،والزين منهم لازم يعطونهم تفرغ وحوافز عسب ينظمون للجهة الي شتغلولها هاي طريقة مناسبة جدا

    تسلمين اختي ع مررورج الطيب

    سي يا

  12. الـهــادئـه... كتب:

    السلام عليكم,,,يسعد ايامك بكل خير,,,

    عساك بخير وصحه وسلامه,,,,

    الكل يشكي من هالشي دائما المواطنين حظوظهم قليله بالتوظيف,,,

    وعجبني موضوع مدينة العين بس مامداني اشارك فيه (:

    طيب بسالك ليش يسمون دبي دار الحي (:

    تحيتي لك صديقي وجمعه مباركه….

  13. مهرة كتب:

    السلام عليكم ورحمة الله وبركاته

    لا تعليق وما قول غير حسبي الله ونعم الوكيل ولا حوله ولا قوة إلا بالله

    ان العين لتدمع وان القلب ليحزن وان على حالنا والله لمحزونون

  14. روضه كتب:

    السلام عليكم

    اختيار موفق أخويه سالم وزين منك أثرت هالموضوع لأنه واقعي وأغلب الأخوه والأخوات اللي بدون وظيفه متأثرين منه .. لأنهم يشوفون خير بلاهم في أيدين الاجانب للأسف ..
    يمكن أصحاب المؤسسات يفرحون بالاجنبي أكثر من المواطن لأسباب هم يعرفونها ولكن ماجربوا يسألون أنفسهم هالاجنبي ولاءه لمنوه أقصد لشوه !! الاجنبي ولاءه للدرهم مب للبلد ولمصلحتها ..
    يعني همه الاول كم يقبض مب كيف يشتغل .. وعشان جيه الأولى منه ولد وبنت البلد عالاقل بيكون قلبهم على مصلحة بلادهم ..

    إخواني وخواتي العاطلين عن العمل لاتيأسون وتبغون نصيحتي اللي يقدر منكم على تكوين عمل شخصي لايتأخر ولا ييلس يتريا الوظيفه ..

    تقبل مروري مع شكري لك لاثارة مثل هالمواضيع اللي تهم الكل

  15. مساؤك ورد,,,لكل مجتمع لابد ان يوجد فيه اشخاص يكونون وبالا عليه ,, لكن مصيبه اذا كان هولاء الاشخاص غير المواطنين ,,فهم يعبثون بكل شي ولا يهمهم فهم لم يحسوا بدفء وطنهم يومآ ,, كان أملي ان يمنح المواطنون فرصه للعمل كغيرهم فهم اولى ,, ولهم الاحقيه ,,,سلمت يمينك على هذا الطرح المتميز..دمت

  16. وافد كتب:

    السلام عليكم

    اليس من حقنا العمل و العيش على هذه الارض

    فإذا لماذا هذا التهكم علينا

  17. مهرة كتب:

    أخي الوافد أي تهكم الله يهديك
    سؤال وجاوب عليه بنفسك

    من اولي يتوظف أهل البلاد ولا الوافد؟
    وإذا انت في بلادك وقدمت ع وظيفه من اولي انت ولا الوافد ؟؟

    ياخوي لاشي تهكم ولا هم يحزنون بس الحق حق

    والساكت عن حقه شيطان أخرس

    وأهل البلاد هم أولي.. يبدون أهل البلاد وبعدين يدبون الوافد ( كلام منطقي )

  18. سالم الامــارات كتب:

    الهادئة

    مرحبا يا هادئة حمدالله عالسلامه يالغايبة ،،،نورتي

    تسلمين يا هادئة ،،،
    دار الحي!!! هاي يبيلها مليونبن لول

    تيك كير

  19. سالم الامــارات كتب:

    مهره

    ان شالله مثل هل امور يوم اتتم اثارتها تتعدل للافضل

    تحيتي

  20. سالم الامــارات كتب:

    روضه

    مرحبا اختي روضه شخبارج؟

    انا مب ضد توضيف الغير اماراتيين ،،،بالعكس الكل فيه خير ونحن ماننسى ان الوافدين خدمو بلادنا من سنين في جميع المجالات ،،، بس هذا كان يوم كنا غير مؤهلين اننا نقوم بالعمل في مجالات معينة ،،،،

    لو نراجع نفسنا بنحصل معظم اباءنا كانو في الجيش او الشرطه ،،،ماقي مدرسين ولا مهندسين ولا اداريين ولا ممرضين ولا دكاترة ،،،بس بفضل الله ثم بدعم دولتنا وشيوخنا قدرنا ناخذ الراية ونمسك في مجالات مختلفة

    تحيتي بيزنيس وومان لول

  21. سالم الامــارات كتب:

    سجينة الذكريات

    اشكر لك تواجدك الدائم والمميز معي ،،،جد استانست بشوفتج

    ربي يحفظج

  22. سالم الامــارات كتب:

    وافد

    مرحبا صديقي

    من الذي قال انه ليس من حقك العمل والعيش على هذه الارض ّّّ!!! نسيت ان هذه بلاد بوخليفة الله يرحمه ،،،وخيره واصل مش لمن هم في البلاد وبس بل على مستوى العالم العربي والاسلامي ،،،

    انا لست متهكما على الوافدين او الاجانب يا صديقي ،،، انا ضد السياسات التي تستخدم في التوظيف ،،،،تعال شوف نسب العاطلين عن العمل من اهل البلاد ،،،شباب وبنات يا صديقي خريجين جامعات ومعاهد ،،، الي عنده بكالوريوس والي دبلوم وماشي وظيفة !!! واذا حصلو وظايف تطون في اماكن اقل بكثير من مؤهلاتهم العلمية ،،،، وللعلم صديقي وهذا انا شايفة ،،،ابناء الامارات حصلوا على افضل تعليم في المدارس والجامعات والمناهج الموضوعه مقارنه بغيرنا من الجنسيات الاجنيبية ،،،صدقني.
    وفي نهاية السنة كل جهة او بنك يقولون وصلنا لنسبة التوطين المطلوبه ،،!! كيف كاعرف؟؟؟

    خصوصا لاعمال الدارية او المحاسبة او الكمبيوتر هاي مجالات المفروض ان خلاص ماتكون الا لابناء الامارات قياس بنسب الخريجين فيها ،،،وصدقني انا يوم ارمس هني لاني اشوف ناس وحالات من عيالنا محتاجة ،،،بس ماحصلو شي،،،
    بس الثقة في الله وفي الاجيال الياية باذن الله

    تسلملي ع مرورك بس اتمنى اني اكون وفقت في شرح وجهة نظري لك وغيرك من الاخوان ،،،،

    بس كل حد في بلاده من حقه انه يطالب بالافضل سواءا له او لاخوانه ،،،

    تسلملي

  23. سالم الامــارات كتب:

    مهره

    مشكوووووووووووووووورة مهره ع مشركتج لي في ردي

    الله يحفظج

  24. إنسانة كتب:

    بعدني ما دخلت مجال الشغل ..
    عسب جي ما لمست هالشي بنفسي ..

    بس وايد اسمع انه فيه تمييز عنصري بين المواطن و الوافد ..
    و طبعا يكون لصالح الوافد فأغلب الأحيان ..

    الله يكون بعون الناس الي محتاية الشغل عسب تاكل عيالها ..
    الله يكون بعونهم بس ..

  25. سالم الامــارات كتب:

    انسانه

    ماعليج تخرجي وتعالي وبتحصلين سوق العمل بانتظارج يا اختي لول

    سي يا

  26. موني كتب:

    مرحبا اخووي

    بصراحه موضوعك يخوف شوي وبالذات نحن اللي مقبلين ع اشغال حاليا يعني شو افهم من الموضوع يا يالمواطن تكرف و وقت اجازتك يحطو واحد مؤقت يضبط روحه بالشغل ويستقر وانت ترد يا تلقى وظيفتك مثل ما هي او خذوها وبالاخير تطير الوظيفه منك .. شو يعني المواطن ما يرتاح

    اظن المفروض يراعونا ونحن عيال هالبلاد يوظفونا ولا البطاله بتنتشر بكثرة ومستحيل نلقى مواطن في اي دائرة حكوميه

    عـ طاري التوظيف اليوم مطرشة السي في مالي لكذا مكان وانشالله القى وظيفة بس سالفه الاجازة هاي تخوف صراحه

    اسمحي عـ ثرثرتي

    همسة:نوني اليوم كبرت سنه ^^
    اختك نووني

  27. مرحبا ياصديقي

    بصراحة ضحكتني كثير

    اثر مب حنا بس اللي علتنا عله مع الشواغر وانتم بعد

    والله اننا تحفة الدول

    وصدق الاجنبي اللي قالي أنتم يادول الخليج راعين خير وناس محترمين وتحبون الخير وتتصدقون حتى انتم تركتونا نكمل الجامعه عندكم مجاني

    قلت : شنو تقول انت اشغلتنا ؟

    قال : اقصد انكم Gulf training only

    قلت : طيب

    قال : اجلس عندكم كم سنه ومن بعدها ارجع لديرتي براتب وزير عندكم واعيش ملك وانتم دربتوني مجاناً

    سكتت وضحكت

    قلت صدقت والله

    الله يكون في العون بس صدق ان اللي في الكراسي تحف مع احترامي لهم
    وأكثر من يجلس للواحد أبن جلدته

    كن بخير ياصديقي
    عبدالله

  28. سالم الامــارات كتب:

    نوني

    هلا نوني نورتي يا نوني لول

    انتي فهمتي غلط …(غريبة اول مرة حد مابفهم علي!! لول) مب تسيرين اجازة واتردين ماتحصلين وظيفتج !! لا ….
    ترى كل سنة تنزل شواغر ….ففي هل شواغر يتم التوظيف …بس بدال لايكون بشكل كامل وتحد عيال البلاد يكون بشكل صوري وبعدين يتثبت …عرفتي

    يعني انا بعترفلج بحقيقة …في وحجه تدربت عندنا الحين وورك بليسمنت …قالو انها اوكي وشغولة وتبي تشتغل ويانا اول ماتتخرج في الصيف …قلت خلاص جهزوا اوراقها ووظفوها تبتدي من الصيف !!!
    شفتي هذا الي اقصده نستفيد من الي يتدربون عندنا من المواطنين واذا اوكي ناخذهم …فهمتي

    وان شالله تتوفقين واتحصلين وظيفة حلوة …نتريا العزيمة لول

    تيك كير

  29. سالم الامــارات كتب:

    كاتب الانثى

    حياااااااااك خوي عبداله شرفتنا

    عيبتني المحادثة الي صارتلك ويا الريال …الحلو فيه انه صريح وواقعي …عيبتني صراااحته ومصداقيته وخططه المستقبلية لول

    وصدقت نعم اكثر من يجلس للواحد ابن جلدتة ….للاسف هاي الانفس امارة بالسوء وطماعه

    تسلملي بو عبدالله

    دمت بخير

  30. تغريد كتب:

    بحق شيء مؤسف …:( لله يعين

  31. midigestion كتب:

    je cherche un bo lou

  32. هييه هاااااه يبتها ع العووقة اخوي سالم ..
    صدقت في كل كلمة في كل مكــــان هالشي .. والله المستعان..
    واللي يقهرك ان بعض عيال البلاد مايساعد عيال بلاده مااعرف ليش 😦

    بس ان شااءلله نحن بنحاول بتغيير هالشي في الناس..
    ودامها بلادنا نحن اولى بها وربي يحفظ بلادنا من كل شر..

    تسلم ع التدوينة الرائعه واللي تييب الغصه شوية خخخ ^^..

    يحفظك الرحمن ويسعدك ^_^