صور رحلتي الى سريلانكا SRILANKA

Posted: 22 يناير 2009 in الحياة حلوة

  اسمحولي يا اصدقائي لاني تاخرت في وضع سفرتي الاخيرة الى سريلانكا ،،،، طبعا انا كنت سائل وين بسافر والي عرفت الاجابة هي العبقرية مفنوووده لووول ،،صج لاقالو ان كيدكم لعظيييم لوول ،،،، واقوول لاقصوصه عرفتي الحين شو سالفة الخدامات لول ،،،عالعموم نظرا لغلاء سعر جلب الخادمات حيث ان اقل سعر لا يقل عن عشرة الاف درهم حاليا ،،،وتضمانا مع العوائل الاماراتية احب اقولكم ان عندي صور جوازات لخادمات سيلانيات على مسؤوليتي !!!! منو يبي !! لول

 بخليكم ويا الصور والفيديو للرحلة ان شالله تعجبكم ،،، واحب اقولكم بان من الحين وساير ،،،كل صوري بتكون محترفه لان وصلتني هديه كاميرا رقمية ااااخر موديل ،،، شكرا لمن اهداني اياها وربي يطول في عمره

 

هذا انا وجدامي معبد للبوذا،،، وطبعا هذا كله ذهب ويعتبر اشهر معبد في منطقة كاندالاما ،،،انا تفاجات في سريلانكا يوم عرفت ان ديانتهم الرسميه هي البوذية ،،،الحمدلله ع نعمة الاسلام

 

^_^ انا حجزت درجة رجال الاعمال بس قصو علي جماعه الطيران وحطوني في السياحيه جد كلت المقلب وانا ساير واتصورو توني راكب الطيارة واشوف الطاوله جدامي مكسورة شو تتوقعون نفسيتي !! صدمه عاطفيه لووووول

 

هذه الصاله الموجوده في الجناح الي خذته وانصح الي يحب يسيرله ان ياخذله جناح لانه اوسع ومناظره اكثر ويكون غرفة وصاله وبلكونتين وجاكوزي بعد ،،،شي جد رائع

 

هذا نهر موجود في الطريق ونحن سايرين الفندق والي يبعد خمس ساعات من المطار !! كنت بعدني ماوصلت الفندق وقفنا نتريق هني وطبعا المميز في هل نهر انهم ينزلون فيله تلعب وتتسبح في هل مكان ،،،وما انسى هل مكان لاني كليت اغلى بيضه في حياتي !! 100 درهم !!! شكلها بيضة ذهب لول

هاي الفيله في نفس المنطقه ومثل ماتشوفونها جدامنا ونروم نشمي بينهم ويالسين يجهزونهم عسب يودوهم يلعبو في النهر

  

 في منتصف البحيره مقابل الفندق وعندي اثنين في القارب يالسين يجدفون ،،، نسيت اقولكم ان الفندق في منتصف محمية وامشي خارجه ،،،واشوف الغزلان والايال هذا الي يشبه الغزال بس ضخم وقرده وطيور وشي خطير ،،،خفافيش !!!! اكون اسير بليل المطعم ولا بهو الفندق حوليني خفافيش بالهبل كون الفندق مفتوح عالغابه ووراه نهر وهو اصلا مبني عالجبل وجدرانه من الجبل ،،،تصورو ااااكل وحوليني خفافيش وانا اشرب وانا اسبح وانا يالس !! كله خفافيش !!! لوووول

هذا الفيل في الفندق تركبه ويلفك حولين البحيرة جد تجربة حلوة

 هذا منظر الفندق من منتصف البحيرة

هاي الشجرة دايما حولينها طيور وعصافير وصقور وطبعا هالمحمية موجوده فيها طيور مادرة غير متواجده الا فيها !

شوفو هل قرده يمثلون عسب اعطيهم شي ياكلونه ،،،، طبعا القردة في كل مكان يدشون الغرف يلعبون ويسرقون اشياء ويشردون !! عادي تشوف قرد يشرد شايل وياه كيس ولا ملابس ناس !!!؟ لول

 

هذا معبد هندوسي طبعا فيها نسبه هندوس وهم الاقرب للبوذيه ،،،وعرفت هناك ن البوذيه تشعبت من الهندوسيه ،،وان بوذه نفسه  كان هندوسي !!!!!!؟

هذا الجاكوووزييي ،،،شي رهيييييييب كتبت اسمي عليه ،،، تصور انك تتسبح والحمام كله زجاج وورا الزجاج سبلان رايحه وراده تشوفك شو بيكون شعورك !!!! لول

 

حلوة مراقبة الفيله وهي تمشي في قطيع !!! شي مخيييييف وانت بهل مسافه صدقوني

 

هذا اوني قلت للسواق وديني  اسوي مساج وداني مكان الله لايراويكم اونه نادي صحي ومساج بالاعشاب ،،طبعا انا داخل هل صندوق الحين موجود ويالس اسوي حمام بخار !! جد !!!! والبخار انا شفته يحط صالونة حارة !! مادري هاي اعشاب ولا كاري ! لول

 

هذا مسجد للمسلمين في كولومبو ،،،الله يحفظهم

هاي السباله يالسه تاكل وتلعب ويا ولدها في بلكونتي لول وع طاوله طعامي لوووووووووول

سمحولي يا اصدقائي مارمت احط صور كولومبواو الفندق الي كنت فيه بسبب بعض الظروف الي صارتلي بس اتمنى انكم استمتعتم ،،، وادعولي

تحيتي

Advertisements
تعليقات
  1. روضه كتب:

    ماشاءالله الصراحه الصور حلوه

    بس أحلى صوره عجبتني صورة الفندق وصورة النهر .. الصراحه الفندق وايد حلو خاصه وهو فالطبيعه وايد حلووووو

    واحلى شي سالفة البيضه الغاليه .. هههههههههههه يمكن لهالسالفه تفسير منطقي وهو إن الدياي مب وايد عندهم وعشان جيه مغلين البيض

    خلاص الحين مالك عذر دام كاميرتك الرقميه صارت موجوده كل رحله لك نبغي نشوفها من الألف للياء ..

  2. ماااشاء الله ع الرحله روعا ـ< بعضها عليها ×
    ولوسمحت كل يوم حط لنا تصوير بمناسبة الكميرا هع
    وربي يعطيك خيرها ويكفيك شرها.
    صوره المسجد تحسسك بالاطمئنان ببلاد كلهم بوذيه 🙂
    تحيتي

  3. مظلومه كتب:

    هلااا والله أخووي سالم

    الصراحه ما توقتها حلوه تجي

    أحم أحم وما شاء الله على التصوير حلو والله يسلمك من المسج الفلفل لوووول

    يعطيك العافيه والصحه

    دمت بحفظ الرحمن

  4. سالم الامــارات كتب:

    روضه

    لا والله مب عشان ماشي دياي !! والدليل اني اخر يوم سرت مطعم هندي وطلبت 3 برياني دياي ويا العصاير والروب وحتى بيض …تدرين كم طلعلي بالاماراتي !!! 12 درهم !!!!!!!!!!!؟ جد صدمه كانت
    لان المطعم هاكي مكان سياحي و ع منظر من جي غالي واايد وبالاكيد الفنادق الاسعار غاليه بعد لول

    تبين الصور من الالف للياء لول لا هاي صعبه شوي بس بحاول كثر ما اقدر ان شالله

    تسلميلي روضه

  5. سالم الامــارات كتب:

    بنت الشيوخ

    بنسوي تحدي منو منا يصور اكثر هاه لول
    زين شو رايج ااجرلج اياها وتصورين بدالي لول
    لا حلو الوضع هناك للمسلمين حتى ان يوم الجمعه ماشالله تشوفينهم سايرين المسجد في جماعات وكلهم ملتحين ماشالله …الله يحفظهم ويثبتهم ع دينهم

    تسلميلي شيييختنا

  6. سالم الامــارات كتب:

    مظلومة

    هلا مظلومه شخبارج انتي لين الحين مظلومه !! لوووول

    لا صرااحه حلوة …يعني تحسينها بشوارعها ومدنها نفس هند صغيره يعني الي سارو العند ولا باكستان مدنها نفس الشي بس على اصغر
    بس كطبيييعه وااايد حلوة يعني بالرغم من مشاكل التاميل الي فيها الا ان فيها سياح صراااحه …شي حلو

    شو سالفة الفلفل مافهمت !

    تحيتي مظلووومه

  7. Hot Chocolate كتب:

    رحلة حلوة بس أعتقد إنها ما تناسب العائلات يعني رحلات شباب فقط
    جو سفاري .. كل الحيوانات حواليكم
    مبروك الكاميرا اليديدة

  8. سالم الامــارات كتب:

    Hot Chocolate

    شخبار شوكوليت
    لا بالعكس صراحه تناسب العائلات … لانها هدوء وامطار طول اليوم والجو معتدل ماشي رطوبة ولا بردوه تكسر العظم

    ع فكرة مدونتج لين الحين مارود ادشها وماطلعلي الي قلتيه Guest visit مش موجود هاك الصندوق اصلا
    فاقتراحي ان فتحي مدونتج من اندشه ردي قفليه لول حشى خزانه مب مدونه لول

    تسلميلي شوكولاته وشكرا ع مرورج وتواجدج

  9. Hot Chocolate كتب:

    أمرنا لله فتحناها أخوي سالم
    🙂

  10. حلوووووووووووة البنات كتب:

    السلام عليكم

    المهم الصور وايد روعه ودايما اسمع عنها وعن طبيعتها الحلوه انشالله اسيرلها السنه .

    مشكور على الصور، والله يوفجك

  11. M!ssfo0fo0 كتب:

    مرحبآآ ..

    الصووور رووووعه ..وبآين ان الرحله كآنت ممتعه ..

    بس مسأله ان القرود تطآمر في وجهـي ماتوقع اني بنبسط بالرحله

    وهم رايحين جآين عندي <—تكره القرود وبقوه *_^

    بس جد جد الصور خطييره وعقبال مانشوف صور لرحلات ثانيه 🙂

  12. سالم الامــارات كتب:

    حلوووووة البنات

    ماشالله ناوية تسيرين السيلان مممم جميل والله ناوية تنافسيني في مشروعي شكلج لول

  13. سالم الامــارات كتب:

    Miss fofo

    عاد القرود مابتطامرون طول الوقت لول شو انتي مووز يتطامرون عليج تبينهم لول
    بس هم يلعبون ويمثلون نفس الي في الصورة واذا شفتي الفيديو شو يسوون …ترى السبلان ربعي من سافرت سيلان واكتشفت ان حتى في الامارات في وايدين من ربعي سبلان بعد لول

    و ع طاري صور رحله ثانية فالج الطيب قريبا اذا ربي اراد

    تيك كير فوفو

  14. بـــو ســـالــــم كتب:

    اللي يسمع عن سريلانكا بيقول شو ها المكان المو شي بس الصراحه وايد جميل

  15. مظلومه كتب:

    ههههههههههههههههههههههه

    هيه للحين يا سالم مظلوم

    سوري كتبت بالغلط كنت اقصد المسااااج الحار هع هع

  16. سالم الامــارات كتب:

    بوسالم

    خلاص ولا يهمك برتبلك اياها لول بس خذ وياك قناع اكسجين في الطيارة ،،،طبعا انت عارف ليش

    مظلومه

    الله يعينج ويخوز عنج الظلم لول
    عقب ماخلصت الحمام حسيت عمري برياني متحرك !! لول

  17. KaikA-MGroMa كتب:

    loooool

    حلوين الشواذي بس ماحبهم ..

    بس بسأل سؤال استراتيجي P:

    شلون ريحة الشوارع ؟ مو بهارات ؟

    لأني تعقدت من تايلند :\ ما كنت اكل شي والسبه ريحة شوارعهم

    تسد النفس :× .

    D=.

  18. ههههههههههههههههههههههههههههههههههههه

    بجد بجد أثبت إنكـ مغامر .. قلنا مغامر بس مولهالدرجه

    شوي ويوقف قلبي .. وع ذالقرود وراكـ وراكـ ..

    بس الحمام الله يكرمك يآشيخ دهـ أبو الفدايح هههههههههههههههههههههه

    تسلم الايادي عالصور .. وانتبه على نفسك .. يمكن تلقى قرد بعد بشنطتك وانت راجع 🙂

  19. سالم الامــارات كتب:

    kaika magroma

    صراحه سؤال استراتيجي خطيير !! شنو بهارات !! شو داشين طبخ شعبي ولا شو !!!!!؟ لول
    يعني اكثر شي ريحة الديزل الي من السيارات ،،،بس هذا في نص المدينه لكن برعها هواااء نقي لان كل الي حولينج خضار واشجاار شي حلو يعني ،،،، مثل ماقتلج هند صغيرة لول

    وبعدين انتي كيكه شو يوديج تايلند !!! سيري بلد الكيك بلجيكا لول احب كيكتهم لووووووول

  20. سالم الامــارات كتب:

    الوحيييده

    المشكله مب بالقرود الي هناك ،،،،القرود الي هني المشكله لووول

    تسلمييلي وحييده ع مروورج ولا تقطعينا

  21. الهادئه كتب:

    يعطيك العافيه على هالصور الحلوه,,,

    صراحه الروحه سيرلانكا بحد ذاتها مغامره (:

    وبعدين شو سالفتك انت والمساج لازم كل مكان تروح له تعمل مساج يعني (:

    بس صراحه شجاعه منك انك تدخل داخل هالصندوق الغريب زين الي ماطبخوك

    وسووك مندي (:

    عجبني مقطع الفيديو حركاتهم حلوه كانت وعورني قلبي على القرد الصغير

    مدري ليش ):

    تسلم الايادي صديقي,,,,,تحياتي

  22. نهـــار كتب:

    السلام عليكم أخوي سالم…
    أهم شي إنك إستمتعت بالرحله وتجربه حلوه..
    بس يا خوي كيف هديت بعمرك ودخلت في التابوت مادري الصندوق …
    حمام بخار بالصالونه ..ههههه
    وتنام على صوت الخفافيش..هههه بيت الرعب…
    مناظر رائعه..
    ومبارك عليك الكاميرا..
    ……..
    دمت بخير..

  23. ماشااااء الله المكان رآآآآآآآئع
    خلاص انا سايره هناك سايره 🙂
    بس خل اخلص اختبارات وع طووول هناك خخخخ

    بس فشلة ,, وين رحتي ؟ والله رحت سريلانكا -___-

  24. مناهل كتب:

    واااااااااااو مرة عجبتني الصور …الله يعطيك العافية اخوي سالم ..سلمت يداك

    بس كيف كان تعامل مع ناسها؟

    موفق بإذن الرحمن

    مناهل

  25. سالم الامــارات كتب:

    الهادئة

    انتس اسمج هادئة بس انا مفروض اسميج مشاكسه ! لول

    والله المساج حلو لووول تدرين الواحد منا يكد ويتعب ويسير ويرد لازم يسوي مساج شوي ويريح عضلاته شوفيها لول

    ع اري الصندوق والطبخ هم عرضو يطبخوني برياني بس انا رفضت …اصريت ع وجبة بخاري لووووول

    بس وحليلج طيبه عيبتج السباله وابنها !! شو رايج اييبهم لج لول

    تسلميلي هادئة واحب اقولج انج مشاغبة لول

  26. سالم الامــارات كتب:

    نهار

    حمام بخار بالصالونه !!
    انا اقوووول لي السيلاني كان شايل كيس خبز ومخبنة ورا الصندوق ..وكل شوي يغطي راسي ! اسميه يالس ياكل صااالونه ! والله اني غبي كيف مالاحظت لول
    كا يا نهار ع ملاحظتج وتنبيهج لي لووووووووووووووول

    الله يبارك فيج وان شالله راح انافسج في التصوير الحين …

    تسلميلي

  27. سالم الامــارات كتب:

    الوان رمادية

    انا كنت نفس الشي اقول فشله سريلانكا ….بس مافيها شي بالعكس
    لو جينا للواقع منو نحن اهل الخليج عسب نشوف الناس من فوق …صدقيني لولا هل بترول الي عززنا ولا كنا للحين عايشين عالولو والتمر والغنم !!!!!!!!!!!!!!؟

    ربي لك الحمد والشكر
    بعدين طيبين السيلانيييين وخصوصا المسلمين منهم
    سيري وبتعرفين والحياه مغامرات يا الوات رمادية …وتنويع الالوان حلو مب كله رمادي عاد لول

    تحيتي

  28. سالم الامــارات كتب:

    مناهل

    تعامل الناس وااايد اووكي وطيبين جدا

    واكلهم اوكي بعد

    تسلميلي ه مرورج اختي مناهل وماقصرتي

  29. مفنوده كتب:

    احم || تقول عبقريه وعقب كيدكن عظيم || شو تتحرا نحن مانعرف بالسياحه والرحلات || طول عمري اسافر روحي هههههههههههههههه

    المهم من زمان وانا اترريا الصور لاني متأكده انهن شي غير || بس بتصدق اذا قلتلك اني اموت في شي اسمه سبلان والله العظيم من صغري اذا شفت سبال ودي اربيه عندي وتلقاني اشتريله موز وبوب كورن بس هو يآمرني

    الصراحه الصور غير طبيعيه و التعليقات احلىىى || عيل يسوولك مساج بالصالونه <.<

    فعلا الرحله شكلها رووعهـ يبيلي اروح سريلانكا بس قبل بتعرف على ابنة الرئيس السريلانكي يقولون ترمس عربي @@ وبخليها تمشيني على حسابي طبعا

  30. مفنوده كتب:

    هيه نسيت اقولك المره الثانيه جان بتسأل سؤال ترا لازم بفلوس

    ع بالك كل مره بجاوب ببلاش

  31. سالم الامــارات كتب:

    مفنودة

    اول شي الناس يسلمون مب احم شو فيج كحه !!! لول

    وانا اعترفت بعبقريتج ودهائج في معرفة الوجهة لول

    بس شي جميل انج اتحبين السبلان ،،،ترى عندنا وايد سبلان في الامارات بس محد يعرفهم لوووووووووووول انا زمان كان عندي سبال بعد ،،،بس مات ّ_ّ هيه نعم توفى لانى السلسله لفت حولين رقبته وخنقته ،،، دفناه عدال البيت !!!؟ حتى كان عندنا ارانب وطبعا اخوي بو سالم كان متخصص في قتلهم !! من يومه وهو سفاح لول

    بس معلومه حلوة اول مرة اعرف ان السبال ياكل بوب كورن !!!!! شو كنتي تاخذينه وياج السينما !!!!!!؟ زين ماعطيتيه ناتشوز بعد لول

    مايحتاي تتعرفين على ابنة الرئيس ،،،خدامتنا زمان كانت سيلانية تحبين اخبرها تمشيج ؟ لول
    ع فكرة اذا تبون بشكارة ولا شي ترى حاضرين وباسعار مغرية !!!؟ لول

    حاضرين بكون اسال وادفع بس انتي خبرينا وين الحصاله وحاضرين بنحط فلوس لول

    تسلميلي مفنووده وخفي من غيباتج لو سمحتي

    سي يااااا

  32. مهرة كتب:

    السلام عليكم ورحمة الله وبركاته

    اولاً الحمد الله ع السلامه ورجوعك الأرض الوطن بسلامه

    شكلك أستانست بسفرة الأن المكاان روعه خاصه أن المكان كله أخضر 🙂

    وأختيارك لمكان الفندق رووووووعه يكفي بس انك اطالع من الشباك ما يحتاي تطلع ههههههه

    بس ما قلت لنا هل كانت سفرة عائليه ولا شبابيه؟

    والف مبرووك ع الكامرة ربي يعطيك خيرها وكفيك شرها

    وربي يوفق الجميع

  33. سالم الامــارات كتب:

    مهره

    صباح الخير !!! هاي السفرة كانت في العيد ـــسافرا ورديت وبعدها بعد سافرت ورديت وانتي توج حمدالله عالسلامه !!! لوووول الله يسلمج ^_^

    الله يبارك فيج وان شالله بتشوفين الصور بالكاميرا اليديده قريبا

    تحيتي لج مهره ولا تقطعينا وايد

  34. lil.D كتب:

    في المنتدى (إصدار الإمارات) في عضو كتب رحلته إلى سيريلانكا .. وأهم شي صور البانيو ع المنظر والزجاج ههههه .. فضايح .. يوم شفت الحين الصورة وموضوعك ضحكت تذكرت السالفة .. حشى -_- شنو هذا !!

    أما الصندوق !! لو شفته جدامي بتيني جلطة!! زين الله سلمك -_- ماشاء الله عليك وبعد دخلت؟ ..
    ((،طبعا انا داخل هل صندوق الحين موجود ويالس اسوي حمام بخار !! جد !!!! والبخار انا شفته يحط صالونة حارة !! مادري هاي اعشاب ولا كاري ! لول))

    ههههههه …. صالونة سالم الامارات -_-

    عسى بس نفعك؟ …

    🙂 شكرا ع التقرير والصور

  35. سالم الامــارات كتب:

    lilD 84

    لوووووووووول هيه والله ستويت صالونه ،،، كاري طازج ^_^

    بس بشكل عام سريلانكا حلوة واااايد ،،لول الحروب والمشاكل الي فيها ولا جد روعه
    تسلميلي والله ع مرورج الطيب وما قصرتي

  36. ضحكة ألم كتب:

    بصراحة سفرة ولا أحلى ..كله بصوب والقرده اللي تمثل عشان تعطيهم اكل بصوب ..وكيف قدرت تاكل وحواليك خفافيش ..
    شكلك تحب السفر..
    عيشتني جو السفر ..وتعليقاتك بعد تضحك
    وهذي اول مرة ازور مدونتك ..ان شالله امر مرة ثانية ..
    واتمنى تزورني في مدونتي:)

    ضحكة ألم

  37. سالم الامــارات كتب:

    ضحكة الم

    مرحبا اختي
    صحيح كلامج انا احب السفر وايد

    وتسلميلي ع مرورج الكريم لمدونتنا وقد قمت بزيارة مدونتج وعيبني طرحج فيها

    اتمنى زيارتج ومشاركتج المقبله

    تيك كير

  38. شكلي بالعطلة بروح لسريلنكا