خلونا نغير في هل عيد!

Posted: 4 ديسمبر 2008 in الحياة حلوة
الوسوم:

  

اذا جينا وساللنا اي حد هل ايام ،،، شو العيد وياكم، يقولون ماشي صلينا العيد (واغلبهم مايصلون يكونون نايمين) وسلمنا عالاهل وكلنا لحم وخلاص !! اتحصلنا يالسين في بيت واحد بس نسلم ع بعض سلام سريع وعطينا عيدياتنا من الفلوس لليهال وانكون خلاص برينا ذمتنا !!! ونرجع لنفس الروتين اليومي الممل ! البعض ممكن انهم يسيرون حدايق او يزورون الاهل اول يوم وبعدين خلاص ،،،صح؟

هل عيد انا مابي نغير روتينا الممل! لا خلونا نفس كل سنه مانغير شي ،،،بس ابيكم تضيفون عليها شي واحد وبسيط !!!؟ شورايكم لو كل واحد فينا ياخذ هديه لامه وابوه !! ولو كان متزوج ياخذ لعياله هديه معينه بدال الفلوس او يكون معاها ،،،وبعد لاخوانا وخواتنا !!!! الهديه تكون حسب امكانياتنا ،،،حتى لو كانت بطاقة نكتبها بخط يدنا ،،،،حتى لو وردة وحده ،،، عطر اي نوع ،، اكسسوار بسيط ،،، اي شي حسب امكانياتك ولو ماتشتغل مثل ماقلت بطاقه تكتبها بيدك وتعطيها لزوجتك او زوجج وامك وابوك !!!! صعبه تشوفونها !!!!؟ خلونا نتكلم كل واحد فينا شو بيسوي وعقب مانعطيهم اياها اول يوم العيد نكتب عن ردود الافعال الي حصلناها وشو كان شعورنا عقب ما عطيناهم الهدايا ،،،،، هل ارتحنا من داخلنا هل كان شي غير وحلو !!؟ ادري ان في منا ناس يقولون لا مابسوي او يستحون او يشوفونها موضوع عادي ،،،جربوها وعقب خلونا نشوف من ردود افعالهم هل كان عادي ولا لا؟

وهذا اباه يكون تكمله لموضوعي السابق (ابي وامي شكرا) ،،، المره سابقه قلت خلونا نسير عند والدينا وانقولهم شكرا ونثني عليهم وعلي سووه حقنا ،،نبس للاسف ماشفت حد سواها وشواركنا ردة الفعل الا ثلاثه يمكن !!!

 اتمنى هل مره الوضع يكون مختلف منا كلنا والبداية تكون في انا نعرف شو كل حد منا بياخذ وعقب اول يوم نرد ونكتب شو كانت ردود الافعال !!! انا كنت ابي ابدي بنفسي بس المشكله اهلي كلهم يتابعون المدونه مابيهم يعرفون شو بسوي او شو باخذلهم ،،، انتو سهله عليكم لول فهااا شو بتاخذون ،،،حتى لو بطاقة بتكتبها بخط يدك مب عيب قولها وكلنا بنكون ويا بعض ،،، ترى نفس هل امور شوي شوي تخلينا نعدل مناشياء وايد في علاقاتنا ويا من هم حولنا لول

اخليكم ويا الكاريكاتيرات تحت ويا الخرفان عسب تبتسمون شوي وتكتبون بنفس منشرحه لول

Advertisements
تعليقات
  1. مفنوده كتب:

    هالفكره سبحان الله قبل كم يوم كانت وحده تسالني شز انسوي بالعيد وطبعا كان جوابي مثل جواب الروتين اللي كتبته في البدايه

    لكن هي قالتلي انه كل واحد يشتري هدايا واشياء بسيييطه جدا واعجبتني الفكره وكالعاده مافكرت اني اسوي مثلها

    لكن اممممممممممم ناويه ارتب الموضوع هذا باذن الله

  2. اقصو صه كتب:

    انا عن نقسي

    اسوي هالحركه كل عيد

    لازم اييب لاهلي شي بسيط فالعيد

    فطبيعي اني بسوي هالحركه

    عندي امتحان اليوم

    اخر امتحان فالآي سي دي ال

    ادعيلي

    ثاني رد 🙂

    يلا سي يو

  3. صادقة مشاعر كتب:

    بعد ماسمعت فكرتك الحلوة اخ سالم فكرت اني راح اشتري لامي عطر وللوالد باخذله فنايل وغتره واخواني الصغارية بتشرالهم عرايس العاب
    انا ماشتغل بس بسوي بلي اقدر عليه وبخبرك عقب ليلة العيد شو ستوى وشو كانت ردود افعالهم

    عيبتني فكرتك اخوي سالم وماشالله عليك نظرتك تشوف لبعيد ولاشياء يمكن نشوفها بسيطه في المظهر بس قيمة في الجوهر

    كالعاده طرحك حلو

    اختك صادقة مشاعر

  4. سالم الامــارات كتب:

    مفنوده

    يالله حلوة فكرة ربيعتج بعد ،،،نيالله اتريا تخبريني شو بتاخذين وشو بتسوين حتى لو شي بسيط ،،،، حتى لو بطاقة من جمعية
    خيريني عقب شو بتاخذين وشو بيصير وياج زين

    تسلميلي مفنودة وما قصرتي ع مرورج الغالي

  5. سالم الامــارات كتب:

    اقصوصه

    الله يوفقج ويسهل عليج وعقبال امتحانات الدراسات العليا لوووول

    حلو انج من المبادرين بهل شي لول يالله خبريني عقب شو بتاخذيلهم اذا حبيتي

    وطبيعي بتكونين المركز الثاني مب انا 11 !!!؟ انا بس لو ترييت عشر دقايق ماكتبت كنت بكون في مركز العشرييين !!! لوووول

    حياج يا اقصوصه وابيج تحكيلي اقاصيص العيد عقب لول

    سي يا

  6. سالم الامــارات كتب:

    صادقة مشاعر

    حلوة فكرة عطر للوالده وغتره وفنايل للوالد صدقيني بيفرحووون وايد
    ربي يخليلج لهم واتكونين ذخر لهم

    وجودج هو الحلو اختي وماتقصرين بوجودج هني

    تحيتي

  7. من أول سنترت هنا و أفكر شو بالضبط آخذ وراح الوقت وصرت الرد رقم 7 خخخ,

    انا ببالي كم فكره بس جد برتب لها وفعلا لو حتى كان شي بسيط لكن الاحساس بقيمتها والفرحه الي تنتج منها تستاااهل^ـــ^
    بخبركم عقب شو أخذتـ 🙂

    يعطيك العافيه ودمت سالم غانم وعيدك مبارك من الحين < اول وحده *ـ^

  8. ماشاء الله عليك سالم ^.^
    فكره اكثر من رااائعه
    وجااري التنفيذ بإذن الله ..
    وراح اخبركم بالنتيجه

    مرسي ع الكركتير ^.*

  9. مهرة كتب:

    السلام عليكم ورحمة الله وبركاته

    عيدك مبارك أخويه سالم الإمارات

    وتسلم ع هل أفكار … تذكر الأعياد للي طافت كنت دوم ايب حق امايه وابويه هدايه للعيد ..،،

    ان شاء الله الماديه عندي تساعندي هل عيد أخذ لهم شي .. الأن العيد للي طاف ما خذت لهم شي .. بس عايدتهم وقلت لهم اريد عيديه هههههههه

    بدل ما اعايدهم انا قلت لهم يعايدوني ..،،

    وعسي العيد عايد علينا دوووم يارب

    وهذي عيديتك أخويه سالم

    موفق

  10. مفنوده كتب:

    توني راده من برا << ماعندها لعب

    امي شريتلها ( عطر فلور بومب وصابون من بودي شوب ) .. ابوي للحين مادري شو اييبله .. .:* *:.

    الصغاريه يبتلهم قلاصات عصير وايد عليهم بعد .. خواتي مايبتلهم شي
    اما يدتي هذي بروحها حفله .. خذينالها كلنا عود ودخون

    امممممممممممم باقي ابوي .. اييبله قطو << بيطردني من البيت

  11. hasm1990 كتب:

    منجد………… غير الروتين الممل نسلام بعضنا يومين …. ونرجع الروتين
    غير الافكارنا هيا نفسها …….

  12. M.K كتب:

    السلام عليكم…
    ما شاء الله على أفكارك أخوي…
    ……….
    أول يوم العيد صعب توزع هدايا ..
    لأنه يبالها تظهر وتتشرا بزحمه…
    فا بالنسبه لي وزعت الهدايا من كم يوم ..
    عشان يكشخون فيها أول يوم العيد…
    وطبعا باجي العيديه..
    صباح العيد بإذن الله…
    جزيت خيرا …
    في أمان الله..

  13. الهادئه كتب:

    مرحبا سالم,,,تسلم الايادي على هالموضوع

    ماشالله عليك دايما سباق للخير وكل ماهو جميل وهذا اكثر شي يعجبني بطرحك

    انك تبحث عن الجديد والجميل والمفيد,,,وانك تذكر الناس في وقت غفلتهم وانك

    تطرح عليهم افكار تساعدهم على كسر روتين حياتهم وماتبخل عليهم بشي من

    افكارك,,,فلك كل الشكر والتقدير على ماتطرحه وتقدمه

    بالنسبه لموضوع العيد فعلا دايما يكون روتين وكل سنه نفس الي قبلها

    وحلوه فكرتك اتو ندخل شي من التجديد لكسر هالروتين,,,

    انا عن نفسي حمستني اني اعمل شي جديد لاهل بيتي وامي الله يحفظها

    ورح نوافيك بالاخبار بعد العيد انشالله (:

    تقبل تحياتي وكل عام وانت بخير وعيدك مبارك ,,,,

  14. بآك << خير شو الي جابك
    أحم بس بغيت اخبركمـ انا بعد اليوم سرت السوق وتقريبا اشتريت هدايا لنصف العائله وغلفتها بطريقه حلوه وباكر النصف الباقي باذن الله ^ـــ^
    انا حاسه بسعادهـ اشحال الي بهديهمـ 🙂

  15. […] سالم الامارات .. وأعجبني ماكتبه في تدوينته الاخيره ( ألقي نظره من فضلك ) حقيقة بوست يستحق وقفه تأمل  وروح مستعده لتغيير.. لذا […]

  16. Hot Chocolate كتب:

    فكرة جدا رائعة … في بالي هدية أييبها لهم من زمان
    بس الحين الوقت ما يسمح لي أقدمها لهم في العيد
    فبنتظر بعد العيد بكم يوم عشان أطرش أخواني يشترونها لهم و أقدمها
    صحيح بتكون متأخرة لكن أفضل من إني ما أقدم شي

    شكرا سالم الإمارات على الفكرة الحلوة .. و بإذن الله بدون ردات الفعل اللي صارت

  17. سالم الامــارات كتب:

    بنت الشيوخ

    يا هلا بشييييختنا والله وانتي بخير ان شالله وين عيديتي !!!!؟ لوووول

    بنت الشيوخ انا بعد شريت وغلفت وان شالله بحط صور التغلييفااات عقب لووووووووووووول الله يديم فرحتج يا شيختنا وفرحة اهلج وترى هل مشاعر حلوة وحتى لو ماحصلنا ردة الفعل شعورنا فيها والاجر والحسنات الي بنحصلها تسوى شي غالي عندنا

    تسلميلي يا شيختنا والله ع فرحتج ووناستج يا رب

    اتريا ردج عقب لول

  18. سالم الامــارات كتب:

    ود القلوب

    تسلميييييييييييييييييييييين يا ود عالدعايه الطيبة في مدونتج وجد جد ما كنت متوقع ان هل بوست راح يعجبكم جي
    والله مستااانس حيل انا وان شالله تشوف نتايجهافي عيونكم وقلوبكم

    صراحف فاجاتيني يا ود صارلج فترة ما كتبتي شي ويوم كتبتي ،،،كتبتي عن تدوينتي ،،،،شكرا يا ود انتي فعلا ود

    ربي يحفظج

  19. سالم الامــارات كتب:

    مفنوده

    تييبيين لابوج قطو !! لول انتي بروحج قطو لووووووووووووووووووووول

    زين الله يخليج لاتنسيني انا بعد ابي ساعه ماركة ايجنار لو سمحتي لوووول

    ربي يحفظج لاهلج ،،،وخبريني اخوج العجييب شو يبتيه ؟ ترى قلاصات عصير ماترضيييييه هههههههههه

    تسلميلي يا مصورتنا العالمية لوووول بس ع فكرة سؤالي ماجاوبتي عليه !!!؟ شو سبب السفرة الفجاااائية لماليزيا لووووول؟ هل هوني موووون؟؟ لول

    تسلميلي

  20. سالم الامــارات كتب:

    hasm1990

    الروتين يقتل كل شي حلو

    الروتين يجيب الملل والتعب والرقااد والكسل وكل شي مو حلو

    خلينا نبتدي باشياء نفس هاي وشوي شوي نضيف عليها اشياء ثانية بتحصل انك حققت تقدم في اشياء وايد لوووول

    حياك الله خوي ع مشاركتك الاولى وياي ونورتنا

    تحيتي

  21. سالم الامــارات كتب:

    M.K

    بعد حلوة الفكرة ،،،،بس حلاة الشغله في وقتها بس بعد تعتمد انتي شو ماخذه وحق منو لوووول

    تسلميلي ام كي واكيد انتي حسيتي بهل احساس لول

    ربي يسهل عليج ويديم افراحكم ويقربج من اهلج واحبابج لول

    تحيتي

  22. سالم الامــارات كتب:

    الهادئة

    تسلميلي والله يا مها وربي لا يحرمنا من تواجدج ودعمج اللااااا محدود لي جد مب مقصره وياي
    اهم شي الوالده خذيلها شي راهي عااااد لول

    انا الحين ساير اشتري هديه موحده لكل اهل البيت !!!! خروووف العيييييييد ههههههههه

    طمنيني عنج يا مها

    تيك كير

  23. سالم الامــارات كتب:

    HOT CHCOLOATE

    دام النية مب موجوده عاد مش مهم وقتها متى يكون لوووووووول

    ونتريا ردة فعلهم يا شوكولاته
    والمثل يقول يا مطول الغيبات يبت الغنايم

    لووووووووول

    حياج شوكولاته وانتهي ع عمرج ترى الدنيا عيد عن ياااكلوونج لوووول

    تسلميلي

  24. سالم الامــارات كتب:

    مهره

    يااااااااااااااااااااااااااااااااااااااااااااااااااااااااي شو هل مفااااجاة الحلوة !!!!!!!!!!!؟ والله والله فاجاتيني
    ربي يحفظج جد ماقصرتي مهره
    واااااااااااااااااااااااااااااااااااااااااايدحلوة من صج لووووووووووووول
    مشكووووووووووووووووووووووووووووورة وماقصرتي

    ان شالله بحطها في المدونة بس مب الحين يمكن بليل بس كان خاطري يكون في شي الصورة لوووووووووووووول بس مب مشكله المره اليايه

    ربي يخليلج اهلج
    انا نفس الشي العيد الي طاف مايبت شي لامي ووعدتها هل عيد بهدية استثنائية لووووووووووووووووووول تستاهل ام سالم

    تحيتي مهره وماقصرتي شكرا

  25. مهرة كتب:

    أسعدني أن العيدية عيبتك 🙂

    ان شاء الله المريه اليايه بيكون احسن من هذا البنر
    وإذا انت عندك صور حاب احطها ع البنر فالك طيب

    وتستااااهل أم سالم كل خير وربي يحفظها لكمـ

    حفظ الله الجميع

  26. مفنوده كتب:

    سالم لالالا هني مون مابسير ماليزيا @@ ابي مكان فيه خساير

    اخوي يدرس اهناك وسرنا نشوف احواله فقط ،،

    هدية اخوي !! هذا بعزمه برا وخلاص .. ولا اقولك ثاني يوم العيد بنسير القريه العالميه بخليه يلعب على حسابي

    والله يا سالم ابوي كان بيشتريلي ” خروف” هديه || عمره اسبوعين ويتيم يحليله امه يوم ربته ماتت

    وعرضوه للبيع ب 300 درهم || حجمه صغيييييييير كتكووووووووووت يناقز ويدلللللع خطف قلبي ,, حط الفكره براسي وقاللي اشرايج طرررررررررررت من الوناسه لكن امي يوم درت بالسالفه قالت انا ولا الخرووووووف !!

    شكلي بشتري لابوي الخروف نفسه اونه مفاجأه

  27. سالم الامــارات كتب:

    مهره

    تسلميلي يا مهره والله وماقصرتي من جد

    الله يخليج وكاني حطيت البانر بس مادري شو سالفته ماظهر كامل
    محد يقدر يعدلي الا دبي !!!!!!!!!!!!!؟ لول

  28. سالم الامــارات كتب:

    مفنوده

    عندي ربيعي بعد يشتغل هناك ومتزوج ماليزية وعايش هناك !!! لول عن يسويها اخوج بعد وياخله ماليزيه لووووووووول

    احب الخرفاان الصغيره لووووووووول تدرين هل خروف في هل عمر لو تسووونه مندي !!! مب لحم عسل عسل !!! واذا تبينه يحلى اكثر ودوه المطبخ السعودي وسوووه بخاري !!!!؟ ولا تدرين بفتح مطعم ان شالله انا وربيعي بنسميه الاماراتي السعودي ،،،عقب ماتشترينه ييبيه عندي وانا بضمنلج الجوده في المذاق لووووووول
    انا صراحه مشكله ويا الخرفان كل ماشوف خروف اتخيله مندي عالصحن !!! احس نفس الاسد الي في كرتون مدغشقر لوووووووووووووووول

    بس انا مب فاهم يعني امج ليش تقارن نفسها ويا الخروووف !!! ايش ياااب لي يااااب لوووووووول

    تسلميلي مفنووده وماقصرتي يا مصورتنا العالمية لول

  29. ام مهرة كتب:

    مرحبا سالم

    ابصراحة موضوع حلو وافكار حلوة وذكرتني بكلام الرسول -صلى الله

    عليه وسلم – :((تهادوا تحابوا )) وانشالله الكل يسويها… والله يجيزيك خير على

    هالفكرة…… لان ممكن هالهدية مهما كانت بسيطة ممكن تشيل الزعل اللي في

    القلوب وتصفي النفوس ….

    فسبحان تاثير الهدية في الانسان اكبر من تاثير الفلوس

    وسلامي

  30. سالم الامــارات كتب:

    ام مهره

    تسلمين والله ام مهره ومنكم نستفيد ربي يحفظج ويكثر من هداياج ومفاجااتج الحلوة لوووووووووووول

    وكثري من زيايراتج وطلتج البهية مافي داعي طول الوقت مطبخ في مطبخ !!! لووووول

    سي يا

  31. Hot Chocolate كتب:

    مرحبا أخوي سالم الإمارات
    اشتريت الهدية و كانت عبارة عن موبايل لكل واحد فيهم .. لأني شفت إنه تليفوناتهم لازم تتبدل
    بس الوالد زفني يوم شافني عطيت الوالدة و يوم درا اني يايبه له بعد قال لو أدري جان دبلت الهزبة … بس الوالدة كانت مستانسة ومتلومة .. والوالد شوي كلمة مني وشوي مناك … بس في الأخير بسط و استانس 🙂

    يزاك الله خير على المبادرة و في ميزان حسناتك ان شاء الله
    لانك خليت الأهالي يستانسون على غير العادة
    يعطيك العافية

  32. سالم الامــارات كتب:

    hot chocolate

    انا مستانس عالشعور الحلو الي حصلتيه وربي يزيدهم ان شالله

    بس تدرين وين المفاجاه !!! اني هل عيد ماحصلت الا عيدية وحده بس هي محفظه

    بالرغم من ان كل الي حولي قرو هل موضوع بس للاسف لا حياة لمن تنادي !!!

    الحمدلله ان شالله السنه الياية تكون ظروف احسن

    تسلميلي شوكوليت ع اهتمامج بوضع الرد

    سي يا

  33. سكنت قلبي، سكنت روحي، سكنت عقلي، سكنت وجداني واش ما عندك دار

  34. سـكـنـت قـلبـي، سكـنـت عقـلـي، سكـنـت روحـي، سكـنـت وجدانـي، واش مـا عنـدك دار