سوالف وذكريات بوسالم (فيديو)

Posted: 15 نوفمبر 2008 in الحياة حلوة
الوسوم:

تحية طيبه الى جميع الاخوان المشار كين والمتابعين المدونه مع اخوي العزيز سالم الامارات الي دايمن يمتعنا ويفيدنا في مواضيعه الطيبه والمناظر الحلوه الخلابه،،، طبعا بعض الاخوان ما يعرفون اني اخوو سالم الامارات الصغير طبعا اخوي سالم هو اخ  وهو بمثابة اب بالنسبه لي وانا الصراحه من الناس الي احب اسمع كلامه لانه والحمد لله مافي مره ماسمعت كلامه فيه وما استفدت ،،،واللحظه الي ما اسمع فيها كلامه تقريبا اندم لكن الحمد لله في الجميع الاحوال انا مستفيد من نصيحته لي واحب اسمعها دائما احمد الله على هذي النعمه الي عندي  طبعا ما بطول في التعريف عن سالم لاني لو تكلمت عنه ما اعتقد اني بخلص لانه انسان يكفينا تواضعه مع الصغير والكبير والتواضع يبين فيه شخصية الانسان والحمد لله

 

طبعا اخوي سالم طلب مني اني هذي المره اشاركم في المدونه وانشاء الله اكون خفيف عليكم بسوالفي لاني انا ما افارق البر وهوايتي الوحيده هو الجلوس في البر سواء لوحدي او مع اصدقائي

 

ايام الدراسه

الصراحه انا من ناحية طفولتي عشتها بطريقه غريبه شوي يعني المدرسه كانت عقدتي كنت ما احب الدراسه ابد ابد لاني كنت من الشباب المغرمين في السيارات بشكل خيالي كان همي الاكبر اني اشتغل وكنت اشوف الشباب كل نهاية الاسبوع جدام المدرسه يفحطون،،، كنت اتخبل كنت اتمنى اني اسوي شراتهم ويكون عندي موتر تفحيط بس المصيبه كانت في هذاك الوقت،،، طبعا سالم لانه من كان يشوفني يسالني عن الكتاب ويبدا يسال ،،،وهني انا كنت اتعقد ابلم ولا اذكر في حياتي اني جاوبته ولا بجواب واحد،،،، طبعا كنه شله من المواقف الي اذكرها في المدرسه الي ما انساها طبعا كان عندي ربيع من الطفوله من الاعداديه الين الحين انحن ربع الي هو علي الملقب ب(بسنتي)،،، كنت دايما اشرد طبعا من المدرسه في الفسحه  وطبعا الاخ بسنتي كان من الشباب المجتهدين ،،،وكنت اقوله قوم نشرد كان يقولي لا انا ما بسير انتو برايكم انقوله على راحتك طبعا كنا نشرد ونقعد في الكفتيريا وفجاه يدش علينا الاخ بسنتي ويقول هات كتبي يا النذل لووووووول ،،،، لانه كنا نشرد وناخذ كتبه ويانا لووول  طبعا انتو تتوقعون الي يسوي جي في ربعه شو بيكون يسوي في المدرسين!!!!!؟

 سور المدرسه ثلاث مرات ارتفع كل سنه يزيدون الشبك على فوق عشان ما نشرد،،، وفي البريك يحطون عند كل سور مدرس عشان ماحد يشرد،،، سبحان الله انا استغربة مره من مدرس في البريك ياي ابي اشرد كالعاده ييت عند السور اقول للمدرس لو سمحت وخر ابي اتعلق على السور بشرد،،، يقولي المدرس لو طلعت السور بضربك قتله تتحدى قال اطلع السور وشف طلعت السور،،، وانا فوق يقولي يلى تعال بضربك قتله انا فوق السور كيف بتضربني بعد ما تسلقت قام قالي طبعا كان المدرس يبيها من الله اني اشرد عشان ما اجننه في الصف والحمد لله على كل حال

 

الوظيفه

بصراحه بعد الدراسه انا طبعا رحت المعهد البترولي عشان اكمل فيه وبالحظ احصل واحد من الشله الي وياي في المدرسه ولقبه كان لقبه حنتوش!!!،،،،،،، كملت اسبوع اسبوعين نفس الناس في المعهد لكن النحاسه وراي وراي طبعا كان قانون المعهد ممنوع التحدث بالعربي في الكلاس ومع المحاضرين طبعا انا كنت اتكلم انقليزي ويا الكل الى مره وحده جنيت على نفسي اول ما دشت المس طبعا كانت لابسه صليب شو كبره،،،،،،

 وكان اول يوم تدريس لها والله بلاها فيني وفي حنتوش طبعا اول ما دشت انا معطنها ضهري قامت اتقولي بالانجليزي اعتدل وايلس عدل قمت قلت انا بالعربي سيري ولي لا حنتوش يقول اخر زمن حرمه بتصلح قعدتك!!!! ،،،،، انا هني عصبت كل ما اتشوفني ولا اتشوف حنتوش نقرضها بالعربي ولقبناها الحمرا !!!!؟ ،،،،،

لانه يوم تتنرفز اتحمر بعد اسبوع طبعا وانحن معيشينا في عذاب اشوف الاداراه الصبح الساعه8 طالبينا دخلت على مدير المعهد قالي انت احمد قتله نعم ويقول للي وياي انت فلان قال نعم قال انتو شو موضوعكم مع المس،،،،،، دشت فجاه وقالت بابا هيدولي هني طلعت المس لبنانيه وانحن طايحين فيها قرض بالعربي!!!!!!!!!!؟ 

 وانفصلنا تمينه نعتذر وانحاول قالت انا الي بيناديني الحمرا الحمرا انا ما بدخل الكلاس لين ما ينفصلون وانفصلنا انا وياه بعدها بدات المرحله الجديه الي هي ما بقى غير الجيش دشيت الجيش

 

الجيش

الحياه العسكريه طبعا من احسن المراحل الي مرت عليه في حياتي،،، لاني الصراحه اتعلمت فيها اشياء وايده واهمها الصبر طبعا في الجيش اتعرفت على شباب من جميع الامارات وشخصيات مختلفه وعادات مختلفه  بس الحمد لله كانت حياه جميله لي في هاذيك المرحله،،، 

 طبعا انا كنت من الشباب الي كنت احب دائما احب اخذ بحقي اذا لي حق من الشباب الي يتمتعون بالجرائه في كل الاحوال واحب الجد وقت الجد ووقت الضحك ما حد احسن مننا طبعا الجيش مواقفه كثيره بالذات ما انسى الشباب الي انتقلو الى رحمت الله الي بحوادث سيارات والي مسجون حياة الجيش،،،، اتعرفون الانسان على جميع مراحل الحياه من المواقف الي ما نساها

 كنت غايب من الدوام تقريبا 15يوم ويوم رديت الدوام طبعا انسجنت لمدة14يوم بسبب الغياب،،، على حضي وانا في السجن كانت فيه قطوه بتولد كملت اسبوع وهي وياي،،، قبل لا اضهر من السجن ولدة القطوه في السجن!!!! لول انتشر الموضوع عند الكل قالو احمد زادوه عيال باركوله والكل كان أي السجن يباركلي وانا معصب من القطوه ومحد راضي يطلعها من السجن وبعدها بديت التزم شوي شوي لين ما الحمد لله هدانه،،، لكن مواقف الجيش ما اتخلص

 مثلا كنا انحن العزاب انسير الدوام بالليل عشان انام الساعه 11 لانه ما انش في بيوتنا الصبح انتم راقدين انسير انبات في الدوام طبعا انام في الدوام وانحن تقريبا خمسه ،،،انتم راقدين الين الساعه5العصر بعد الدوام!!!!!!؟ يعني اساسا انتم رقود !!!

 وانرد البيت كان الضباط يتينون مننا يقول انتو مو صاحيين والحمد لله طبعا كملت 9 سنوات في الجيش بعدها اتقاعدت من الجيش بسس اصابه بسيطه والحين اشتغل في شركه خاصه طبعا الحمد لله انا متزوج الحين وعندي سالم طبعا الحمد لله الوضع الحين اتغير وايد من قبل الزواج بفتره هدينا وايد والحين الحمد لله نتحمل مسوليه وغيره من الامور

 

وانشاء الله ما كنت ثقيل عليكم بس طبعا اخوي سالم ما حبيت اني ارد طلبه لاني انا الحمد لله ما احب ارد اخوي سالم في أي شيء واشكره  في نفس الوقت لانه عطاني المجال اني اشارك وياكم في المدونه ،

وهذ الفيديو ضحكني وايد وهو اهداء مني لكم

 

وفي النهايه استسمح من جميع المشاركين على أي تقصير واي كلمه كتبتها بالغلط

Advertisements
تعليقات
  1. الهادئه كتب:

    يعطيك الصحه والعافيه يابو سالم,,,,

    يعني انت كنت تسوي سوالف في المدرسه وبعد اخوك سالم كان يسوي سوالف في المدرسه يعني يقربولكم مدحت صالح وعادل امام واحمد زكي الي في مدرسة المشاغبين (:

    طبعا اسمح لي اكون اول حد يرحب فيك في بيت اخوك,,,واستمتعت بسوالفك,,وصراحه ماقصرت فيكم الحمراء تستاهلون (:

    بعدين وش هالالقاب الجميله بسنتسي وحنتوش طيب انت وش كان لقبك اكيد بروسلي (:
    وبعدين ابي افهم شي انتو ترحون الدوام وتنامون هناك طيب اذا طلعتو للبيت وش تسوون ؟ بعد تنامون (: والحمدلله انك عقلت بالنهايه (:
    بس حلو انو الانسان يعيش كل مرحله من عمره ويستمتع فيها….
    بس بسالك واعترف الي بالفيديو هذا انت وسالم (:

    مره ثانيه احييك يابو سالم وتقبل تحياتي……

  2. lil.D84 كتب:

    حيالله راعي القطاو لووول
    ترا حبيت سالفة القطوة ضحكتني 🙂 ….

    أول شي حياك .. ودائما مرحب بك .. وعقبال مدونتك الخاصة …

    ثاني شي .. غريبة الأخ سالم ينصحك ع الدراسة .. وهو روحه كاتب موضوع شو كان يسوي أيام المدرسة!!!

    ثالث شي .. شخبار القطوة؟ .. لا يكون خليتها >_< مسكينه!! ..

    وأخيراً .. شكرا ع الفيديو!! اللي صدمني نفسياً !!!

  3. بـــو ســـالــــم كتب:

    الهادئه

    مرحبا فيج طبعا انتي سالتيني يوم تردون البيت شو تسوون كنا انسير البر على طول بالنسبه للقب مستحيل اني اطريه لانه قوي شوي واشكرج على مشاركتج

    بوسالم

  4. بـــو ســـالــــم كتب:

    lil.D84

    مرحبا فيج الصراحه موضوع القطوه هذا عمري ما كنت ابي حد يعرف عنه بس الحين عادي والله انقطعت اخبارها لووووول واشكرج على مشاركتج الطيبه

  5. بو سالم

    أشكر سالم اللي اتاح لنا فرصه نقرا كتاباتك

    أسعدتنا بذكرياتك بو سالم ^.^

    يعجبني الانسان اللي يتمتع بسنوات عمره

    ويعيش كل سنه بحلوها ومرها ..

    أكثر شي ضحكني

    ( موقف ربيعك يوم دخل عليكم الكافتيريا <= الشرده بالغصب ماخذين الكتب لول )
    ( موقف القطوه <= تأديب مضاعف ههه )

    بو سالم ..
    ( عقبال مانشوف لك مدونه .. ومشكور ع المقطع ^.^ )

    دمت بخير ..

  6. مراحب بو شهاب

    يعطيك العاافيه الصراحه ما تتخير عن أخوك ومواقفك كله ( ترتوب ) وضحك

    وعلى طاري الحمرا >> طلعت لبنانية الصراحه ما تخيل طايحين فيه قرض واهي تفهم الله يعين شو كنتوا اتقولوا هع

    وما شاء الله السجن استوه مستشفي عندك لوووووووووووووول الله يزيد العيال ههههه

    تسلم اخويه

    وعلى المقطع ما اشتغل عندي *_^ اهي ابو اشوفه

  7. ماشاء الله,,, الله يخليكمـ لبعض سنـد وعون ^ـــ^

    اما سوالف المدارس وبسنتي وحنتوش رهيبه هههههههـ

    استمتعت وانا أقرا جوكمـ ,,

    يعطيك العافيه وربي يبارك لك بسالم 🙂

  8. بـــو ســـالــــم كتب:

    ود القلوب

    شكرا على المشاركه الطيبه والحمدلله على الماضي والحاضر

  9. بـــو ســـالــــم كتب:

    مظلوووومه

    والله موقف القطوه اثر على شخصيتي في الدوام قبل زين اني تقاعدة قبل لا اتعقد اكثر لووول كنت اقولهم طلعو القطوه ماكان احد يبي يطلعها بالنسبه للمدرسه ترى موقف علمني اشياء وايد والحمد لله على كل حال واشكركم على المشاركه الطيبه

  10. بـــو ســـالــــم كتب:

    بنت الشيوخ

    شكرا على المشاركه وشكرا على الدعوه الطيبه الي الانسان يتمناها دوم يزاج الله خير

  11. اقصو صه كتب:

    امس كنت بكتب رد

    وانشغلت بشي طارئ

    وما قدرت ارد الا الحين

    امس كنت بكون اول تعليق

    اليوم رقم 11

    شفت حال الدنيا

    بين يوم والثاني كل شي ينجلب

    خخخخخخخخخخ

    حلوه التدوينه

    ما شالله عليك لك ذكريات مشرفه بكل مكان

    عندي احساس انك انسجنت ايام الثنويه بقضية ضرابه ويا الشباب

    لوووووووووووول

    والله انتووا الاولاد حاله

    ملفكم مليان بالسجل الاجرامي خخخخخخخخخ

    احنا البنات حليلنا كل ذكرياتنا عن الدكان والرسوم والابلواات

    والاذاعه المدرسيه!!

    حلوه وايد التدوينه عيبتني

    خبر اخوك راعي المدونه انه عيب عليه يأجر المدونه من ورانا

    لوووووووووووول

    وترى انا نزلت تدوينتي اليديده

    لا يحتشر عقب ويقول انا ردي اخر الناس محد خبرني ولا شي

    يلا سي يو فالتدووينه اليايه

    اللي ما دري عاد منو اللي بيكتبها 🙂

  12. M.K كتب:

    السلام عليكم بو سالم……
    أسعدك الله…
    صراحه انتو الشباب مواقفكم بالشرده من المدرسه
    تنفع تصير أفلام…
    بس غمضني ربيعك …
    يحليله يدور كتبه…
    كيف رضى يرابعك مادري(رفقة سوء)هههه أسولف لا تزعل..
    والإستاذ يباها من الله يفتك من الصدعه..
    لو مكانه كنت سويتلكم باب سري لشرده ..
    ……
    مواقفك حلوه مع المس الحمرا,,, وعيالك ..آسفه أقصد لقطاوه…
    ………..
    الله يخليك أخوك وأهلك ..
    ويحفظكم يارب..
    والحمدلله أن هداك…
    ……………
    ومشكور لمشاطرتنا ذكرياتك…
    في أمان الله..

  13. بـــو ســـالــــم كتب:

    اقصوصه

    والله الصراحه انتي شرشحتي سالم بطريقه حلوه لوووووول وفي كم واحد بعد بس نفس ما تعرفون سالم القلب الحنون عادي طيحو فيه لوول

  14. بـــو ســـالــــم كتب:

    m.k

    مشكرين على المشاركه وانا احمدلله على كل حال وشكرا لكم جميعا

  15. موني كتب:

    ههههههههههههههه هههههههههههههههههههههههه هههههههههههههههههههههههههههههههههههههههههههههههههههه

    نايس حركاات صراحه انت فضيييييييييييييييييييييع

    بس عيبتني سالفه الشرده هع هع هع ابغي اجربها هع هع هع

    الفيديو تحفه بس باي لغه ما فهمت !!!

    يللا بااعوووو

  16. أم مهـــــرة كتب:

    مرحبا بوسالم ،،،،

    شو هالموضوع الحلو ،،،لول كله مغامرات،،،،،

    بس انت الظاهر نسيت اتخبرنا مغامرة كنت واااايد اسمعها تتكرر،،،،،،،

    فاليت اتخبرنا مغامرتك مع الارنب لوووووووووووووووول ونحنا والقراء في انتظار

    نسمعها……

  17. بـــو ســـالــــم كتب:

    ام مهره

    انتي عزيزه وغاليه ترى الله سبحانه يامر عباده بالستر وانتي ماشاء الله عليج وانا في خدمتج في اي وقت اختي العزيزه وما اذكر اي موضوع تتكلمين عنه

  18. صادقة مشاعر كتب:

    اضم صوتي لام مهره

    نريد ان نعرف لقبك يا بوسالم؟ وشو معنى بسنتي وحنتوش ؟

    اول مرة اسمع هل اسامي ؟؟؟؟؟

    وشو سالفة الارنب؟؟؟ لايكون بياع ارانب؟

    تسلملي بو سالم ع كلامك وامبين مدى احترامك وحبك لاخوك سالم وربي يديم محبتكم ومايفرق بينكم ويبعد عنكم عين الحاسدين

    اخوك مبين عليه عاقل ومدونته جدا مفيده من بد باقي المدونات الموجوده على الساحه لانها تمس واقعنا
    عقبال نشوف مدونتك
    بس ارجو انك اتجاوب عالمكتوب فوق ^_^

  19. بو سالم..

    جيت بارد ورجعت مع دربي..شفت كلهم بنات..بس على قولة احلام ..حشرٍ مع البنات عيد

    لاتزعل يامطوع نمزح..

    بعدين القطوه جابت بنت والا ولد..الله يقومها بالسلامه..

    ههههههههه

    اعجبتني سوالفك..عساك دوم مبسوط

    صديغك../مهايطي

  20. بـــو ســـالــــم كتب:

    صادقة المشاعر

    اشكرج على المشاركه بس سالفة الارانتب شوي قويه عشان جي توهقت لاني المشكله ما اقدر اقول بس الله يهديها ام مهره توهقني بس عادي ومشكوره على المشاركه مره ثانيه

    وبالنسبه للاقاب انا ما كان لي لقب وربعي هاي القاب عشوائيه وشكر

  21. بـــو ســـالــــم كتب:

    مهايطي

    مرحبا يا اخوي شكرا على المشاركه والقطوه والله ما اري شو علومها لي مده عنها وشكرا على المرور