اماراتي الجنسية ولكن ليس اماراتي الهوية!

Posted: 5 نوفمبر 2008 in مشاكل تحتاج حلول
الوسوم:

موضوع اليوم شوي حساس يتعلق بالعادات والتقاليد واصولنا نحن كاماراتين وايضا كخليجيين في بلادنا ! وانعكاسها في تعاملاتنا وعلاقاتنا ببعض في مختلف مجالات الحياة، واتمنى ان محد يتحسس مني او يفهم اني استقصد فئة او اشخاص معينين … بس امور لمستها موجودة عندنا وحبيت اطرحها لان فيها مشاكل نحن يمكن متساهلين فيها او متغاظين عنها …

 من خلال احتكاكي في كثير من العوائل والناس شفت فروقات كبيرة وكثيرة بينا ! يعني في بيتنا مثلا …عاداتنا في الضيافة وفي اللبس، طريقة كلامنا مثلا ولهجتنا، حتى أكلنا الي ناكله في البيت (طبيخنا)، تختلف تماما عن جيرانا المتلاصقين فينا !!!

ونفس الشي بالنسبة للمجاورين لهم وهكذا !!؟ طبعا ما ننسى مسالة الاصول تلعب دور …يعني الي اصله يمني غير عن الي اصله عماني وغير عن العجمي غير عن حتى السمر (الخوال) !!؟ طبعا في الامور المذكورة فوق …نحن في النهاية اماراتيين او حتى في الكويت او البحرين او قطر …ومابقول السعودية ولا عمان بعدين بتعرفون ليش …… بس هل اشياء تسوي مشاكل وفروقات عندنا يمكم ماتكون كبيرة بس يوم يستوي احتكاك بينا البين في بعض الامور نلمس هذه الفروقات …بالنسبة لي الفروقات الي فوق ماتقدم ولا اتاخر خصوصا انها بدت تنتهي مع الاجيال القادمة بس تبقى مسالة وقت … بس في قروقات مرتبطة بعاداتنا العربية وما ننسى النخوة والكرم والجود العربي …واحترام من هم اكبر منا في السن … والمواقف الرجولية المتاصلة المرتبطة ببيئتنا ودينا …للاسف كثير من الشباب انتهت من عندهم هل اشياء …اكيد لها اسباب وعوامل كثيرة مثل التحضر ونسبة الاجانب الكبيرة في بلادنا واختلاطنا معهم …بس ليش نحصلها عند ناس وناس لا !!؟

انا ماقول ان نلتزم بعادات قد يراها البعض صعبة مثل الصيد بالصقور او رقصات شعبية او يسيرون يحلبون الابل او يسيرو يصيدوا في البحر ..لا نبي عادات التعامل والاخلاق …مثل مايقولون كلا يفعل باصله … يعني اذا جينا في بعض عادات الضيافة يوم نسير بيت عرب متمسكين بعادات اهل الامارات…ولاول مرة تزورهم …ماتظهر من عندهم الا وذابحيلك ذبيحة… غير مسالة طرق تقديم الفوالة والتمر والقهوة  واخذ العلوم… بس تسير بيت بعض العوائل او القبائل الي مازالت ماشية ع نظامها السابق …حتى دياي مايحطولك !!! وماتحس بقيمتك كضيف عندهم …اتحس ماعندهم نظام او اساس يمشون عليه …مثل مايقولون هشك بشك

خلي يستويلك حادث او تطيح في مشكلة في الشارع او في حياتك…ماعادت النخوة موجوده عند الناس لمساعدتك …. تفكير الشباب كله تغير في كل شي …اتسلم عالواحد اتحصله مايعرف اصول السلام …محد عنده كلمة ريال …للاسف تقعد مع واحد تسمع منه كلام ووعود بس كلها كلام في الهوا مالها اي اساس !! يعني حرام عليه اللحية والشنب الي ع وايهه !؟ نفس الشي البنات مايعرفون اصول التعامل مع الي اكبر منهم او انهم يقدرون الشي او انهم يطيعون امهاتهم وابهاتهم …طبعا اذا مافي اساس صحيح فكيف بنطلب من الفرع انه يكون طيب !؟

للاسف حتى في كثير من العرب بدت هل عادات وهوية اهل الامارات تروح وتنتهي من عندهم !!؟

يعني نسافر دول برع مع بعض او حتى نقابل اجانب في البلاد هني …وانكون من بلد وحده بس كل حد فينا غير !! حتى في عدة مناسبات الاجانب يسالونا يقولون انتو من نفس الدولة !!!؟ لان كل حد له عادة مختلفة! هذا ونحن مجتمع صغير …وما وصلنا المليون بعد …كيف لو كثر عددنا !!؟

في عمان مثلا وفي السعودية تشوفون ان التمسك بالعادات والقيم جدا جدا رائعه والناس تعرف الاصول وواجباتها واتحشم بعض …حتى الي اصولهم مب من السعودية مثلا بس مشو على نظامها وعاداتها وقيمها ….فليش نحن عندنا ماصار جي !!!؟

انا اشوف ان وسائل الاعلام والجهات التربوية واتثقيفية لازم تبين هل امور وتوضحها واتقربها من المواطنين لان هذا اساس بلادنا وعاداتنا …نحن مانبي باجر نستوي مثل امريكا ولا استراليا كل حد بنظامه ونفقد هويتنا مب بين الوافدين الموجودين عندنا …لا …هويتنا بينا البين نحن كاماراتيين …لازم نرد لعاداتنا وتقاليدنا واحترامنا للكبار …واذا الواحد ماتعلم هل شي في بيته بسبب اصل اهله من هو صغير فاعتقد ان العادات معروفه …واصول وقيم العرب معروفه وهذا شي مايدرس … طالما انك تمثل بلدك لازم تقوم بواجبك على اكمل وجه …طبقها وبتمشي الامور.

Advertisements
تعليقات
  1. 3washy كتب:

    السلام عليك اخويه سالم ..

    الصراحة موضوعك وايد حلو و اول مرة احسك كتبت موضوع من خاطرك يعني كفيت ووفيت .. والصراحة كل هذا بسبب غيرتك على هوية اماراتنا ..

    سالم بالنسبة لعاداتنا و تقاليدنا احسها اندثرت بسبب التطور والتقدم السريع اللي صار عندنا .. والحينه بذمتك امنو فاضي للعزايم والذبايح !! اذا كل واحد يانا سويناله ذبيحة ما بنخلص لول ..

    انا اقصد ان الناس صاروا مشغولين اللي بدراسته واللي بشغله او اشغاله واللي بمشاريعه ..واذا حصلوا فرصة شلوا بعمارهم و سافروا يعني مب مثل قبل .. وغير جيه قبل الناس ماكانوا يقدرون يتواصلون يعني لا عندهم تلفونات او طريقة تواصل واذا حد ياهم من منطقة بعيده او من مده ما شافوه اكيد راح يسووله عزايم و ذبايح ..^_*

    وبعدين اخويه مجتمع الامارات فيه خليط من اصول عديده يعني اللي يندرج من اصول سعودية واللي يندرج من اصول يمنية واللي يندرج من اصول ايرانية و بلوشية ..

    وطبعا لكل بيت عادات و تقاليد في منهم متمسكين فيه وفي منهم تركوه..

    ماراح اطول عليك اخويه بس راح اقولك شي واحد اهل الامارات بالتطور اللي هم فيه معروف عنهم بالطيب وكرم الضيافة والشهامة ..

    وفي النهاية اقولك موضوووووووعك وااااااااااااااااااااااااايد عيبني وطرحك مميز ^_^

    تحياتي لك

    ^_^

  2. ((واصول وقيم العرب معروفه وهذا شي مايدرس ))

    يعطيك العاافيه اخوي يعجبني غيرتك ع بلادك وعاداتك وقيمك ,,

    انا صحيح مب إماراتيه ولاخليجيه بس عربيه مقيمه بالسعوديه وهذا الشي مايعني اني اتخلى عن عادات بلادي وعلوم اجدادي ,,

    النخوه / الشهامه / الكرم / الضيافه / الكلام / الاصول بشكل عامـ واجب الاهل غرسها في ابنائهمـ حتى مع التطور والتقدم المفروض ماتندثر,,

    وبعدين ماننسى هذي بعد من قيمـ إسلامنا ^ـ^

    ليش تندثر هالعاداتـ احتمال بسبب كثـرة العجمـ والاختلاط بهمـ
    والتربيه من الساس والاهل ,,,

    يعطيك العااافيه والسموحه 🙂

  3. lOsT كتب:

    عادت التعامل والأخلاق قبل لا تكون هويه اماراتيه هي في الاساس عادات تعلمناها من الرسول عليه الصلاة والسلام ومن دينا الحنيف ..

    يعني الأمثله اللي ذكرتها من السلام إلين اكرام الضيف هذيله اشيه أمرنا اياها نبينا عليه أفضل الصلاة والسلام .. يعني بدال لا نقول هويتنا ضاعت نقول بعض خصال الإسلام ضاعت للأسف !!

    الحل في بيوتنا كيف !! يعني نربي عيالنا عن طريق تذكيرهم بأحاديث الرسول عليه الصلاة والسلام .. مثال يا ولدي نبينا كان يسلم على الجميع وإذا نحن سوينا مثله راح نطبق سنته وناخذ الأجر من رب العالمين

    ..

    على طاري اختلاف العادات على فكره ساعات ايونك عوايل من نفس القبيله بس يختلفون فالعادات =)

    الحينه مب مهم اختلاف العادات كثر ما ان هالعادات لازم تكون عادات طيبه

    وفقكم الله لما يحب ويرضى

  4. مفنوده كتب:

    الموضوع بالصميم اخوي سالم || مع التطور العمراني الموجود عندنا تغيرت نفوسنا .. يعني قوللي متى اخر مره اكلت فيها اكله تراثيه .. طيب متى اخر مره دخلنا بيت فيه ريحة التراث

    صرنا نسابق الزمن || اي عادات وتقاليد اللي تدور عليها .. الحين عصر الغني اللي يدوس الفقير .. وانت اكيد تشوف في الدوام اذا الاجنبي منصبه كبير بتلقاه يكلم المواطن من خشمه ..

    بالنسبه لكلام الرجال || اي كلام واي خرابيط .. والله الحين م اسمع اي شي ادخله م اذ واطلعه من الثاني اصلا الواحد مايقدر يلوم حد ..

    اتصدق ياسالم يمدحون مطعم بالكويت مسوين داخله كله من التراث يعني الموظفين لابسين وزار وهالحركات << طبعا مب كويتيين

    والطاولات مفروشه على شكل غتره .. والاكل تراثي بعد || والله مادري اذا عندنا في بوظبي نفسه بس من صدق اشتقت لهالاجواء ..

    خلينا نتكلم عن الضيافه ,, الضياف = مقبلات .. متفقين ولا لا ؟

  5. M.K كتب:

    السلام عليكم…
    موضوعك فعلا مهم أخوي وتشكر عليه…
    ………….
    أنت بديت وقلت كل واحد وأصله بالفعل ….
    عاداتنا نحن العرب وحده حتى لو إختلفنا بالجنسيات…
    ولاكن للأسف البعض تعولم …
    مثلا نحن عندنا أي حد بيزورنا لازم مثل ماقلت الذبايح تكون والمه..
    بس للأسف إذا سويتلهم ذبايح و وويبتهم البعض يشوفك جديم….
    يعني جنه يقولك خبرك عتيج…
    الناس الحين تعزم في المطاعم…
    ……..
    نحن بيئتنا الإماراتيه للأسف لما إنفتحنا إنفتحنا بأسلوب خطأ…
    يعني أخذنا من من حوالينا من أعجام و غيرهم …
    بعض العادات وإحتفظنا فيها ومع طول المعشر صرنا نتبعهم لأنهم أغلبيه..
    فستوت عاداتهم هي الأصل …
    …………
    بالطبع نحن لانميز بين عربي و لا أعجمي …
    ولاكن أميز وبشده بين عادات المسلم وغير المسلم…
    أنا كنت ماخذه نفس موقفك بأنه النخوه ماتت والرجوله إندثرت ..
    ولاكن مرت علي مواقف أرجعت لي الأمل بشباب هذه الأمه…
    …….
    تبي الصراحه أخوي نحن لازم نرجع لتعاليم دينا الإسلامي
    عنده فقط نكون نحن ومجتمعنا بخير ..
    ولو كنا أقليه في بلدنا..
    ……………….
    دمت بخير

  6. lil.D84 كتب:

    ماشاء الله يا سالم 🙂 وماشاء الله ع اللي رادين قبلي
    مب مخلين شي الواحد يقوله ..

    إذا انت تتنقد على الذبايح، شتقول عن اللي عيالهم مايعرفون يمسكون الفنيال؟

    وإذا تنقدت على العادات مختلفة بين الجيران، شتقول على اللي يعيش عدالك سنين ولا تعرف عنه شي؟

    وإذا تنقدت على النخوه، شتقول عن اللي حد من اهله محتاي، ويصرف فلوسه شرق وغرب؟

    وإذا تكلمت عن الرجوله، شتقول عن الميك اب والصوالين الخاصة بالرجال اللي اصبحت تنافس النساء؟

    وإذا تكلمت عن بنت العرب، شتقول عن اللي باعت عمرها برخيص، ونست الحشمة والأدب والأخلاق؟

    الهوية الإماراتية بدت تضيع، وهذا كله بسبب التطور اللي انفرض علينا فرض من (العولمة) .. ولكن الحمدلله ان للحين في الكثير من العوائل اللي متمسكة بالعادات والتقاليد .. وللحين يربون عيالهم صح .. 🙂 .. !! .. ولحل مثل هالمشاكل المفروض كل واحد يبدأ من بيته 🙂 .. !! .. وينصح اصدقاءه واللي حوله!! .. وان شاء الله بنرد ع الاقل شرات اول في العادات والتقاليد 🙂

    شكرا سالم على الموضوع .. !

  7. سالم الامــارات كتب:

    عواشي

    اتفق وياج ان محد عنده وقت والكل مشغول
    نحن مانبي حد يودر كل شغله ويجابل المسلخ والذبايح والمندي (الله اشتهيت المندي) بس مثل ماقلت ابسط الامور في العادات من سلام واسلوب عسب يوم حد يشوفنا برع يعرفون اننا من الامارات مب ينسال كل واحد انت من وين !

    ادري ان كثير اصولهم مب عربية بس انا قلت حتى العرب بدو يتركو عاداتهم ويتساهلون فيها ….على جدام صدقيني مابنعرف عاداتنا ولا هويتنا كمواطنين !!

    تسلميلي عواش وربي يحفظج ماشالله عليج دومج من المشاركين الاوائل عندي لول

    سي يا

  8. سالم الامــارات كتب:

    بنت الشيوخ

    مثل ماتفضلتي ان هذي بعد من قيمـ إسلامنا ^ـ^

    ليش تندثر هالعاداتـ احتمال بسبب كثـرة العجمـ والاختلاط بهمـ
    والتربيه من الساس والاهل ,,,

    انا وياج 100% ….التربية والسا هي الاساس

    ربي يحفظج يا شيختنا …ممكن بيت شعبي !

    تحياتي

  9. سالم الامــارات كتب:

    lost

    هذا شي اكيد اصلا لو اتلزمنا بالسنة النبويه وبعادات الرسول كان مب الا حال المواطن الا حال الامه كله تعدل !!!!

    اتفق وياج عاداتنا من دينا

    وتسلميلي ع مروووووووورج يا لوست

    سي يا

  10. wedalqlob كتب:

    ( احسك كاتب الموضوع من أعماق قلبك :d )

    أتوقع أن سبب الابتعاد عن هالعادات
    العربيه الجميله التي كان ومازال الاسلام يؤيدها
    ويشدد عليها ..

    هو الفهم الخاطئ لمعنى التطور

    والدليل ان الشباب يسمون
    كل عادات العرب والقيّم الاسلاميه ( مال اول )
    وكل حركات الاجانب ( والله كول ..)

    يعني لو نفهم التطور عدل بعقل
    وان مايخصه بثوبنا وعادتنا وتقاليدنا .. كمسلمين أولا
    وكعرب ثانيا ..

    بيكون الخليجيين وليس الامارات فقط بحال أفضل ..

  11. السلام عليكـ أخويه سالم .. الصراحه موضوعك ما عليه كلاام

    ومثل ما قلت فوق ((اماراتي الجنسية ولكن ليس اماراتي الهوية!))
    أنا أشوف والله أنا الاجانب والدول العربية وغيرها قاموا ياخذوا عادات وتقاليد الامارات ودول الخليج ونحن قامت تندثر عنه …

    وشرات ما قال أخوي lil.D84 شتقول عن اللي عيالهم مايعرفون يمسكون الفنيال؟

    لا وصاااروا لبسهم وتصرفاتهم وحتى الرمسه كله غيره وحتى البنات كل حد تغير الناس تغيرت عشرت عمري ينسوها عسب تغيرات التطور

    الصراحه كثر ما برمس ما بوفي عن اللى رمسوا قبلي كل وحده منا كفا ووفا وان شاء الله الناس اتفكر وكل واحد يذكر شوية من عاداته وتقاليده ..

    ((حلـــو التطور .. بس أحلى الواحد يبقي على عاداته))

    أشكـــرك على طرحكـ ..

  12. ٍسعود كتب:

    مو غريبة يخوي

    عندنا وعندكم خير

    الأجانب غزوا الخليج واكسبوا اهلها عادات دخيلة

    ربي يستر على الجميع

    تقبل احترامي اخوي سالم

  13. بـــو ســـالــــم كتب:

    والله يا اخوي موضوع رائع جدا نفس ما تفضل اخوي سعود بالكلام لي قاله ما بزيد عنه شيء بس اهم شيء الواحد يتمسك في عاداته الطيبه والحميده وفي النهايه الكل لو مشى على كتاب الله العادات راح تكون وحده وبالتوفيق اخوي الكبير

  14. سالم الامــارات كتب:

    مفنودة
    انتي شكلج كنتي تكتبين الرد وانتي يوووعانه !!؟

    اول شي مطعم لابسين فيه وزار وفانيله وغتره
    وبعدين ضيافه = مقبلات !!!! شومقبلات حمص ولا فتوووش !!! لوووول

    هيه شي مطعم الظفره يلبسون جي احيدهم عندنا وفي مطاعم ثانية بس في دبي

    رجاءا كوني تاكلين بعدين تكتبييين بلييييز لووول
    زين ماكتبنا موضوع عن الاكلات الشعبية كاان مادري شو سويتي لول

    سي يا لول

  15. سالم الامــارات كتب:

    M.K

    تسلميلياختي ع ردج الحلو ماشالله غطيتي موضوعي من كل جوانبة
    بس انا اقول خلونا نحن نبديها من بيوتنا عل اقل وانعلم الي حولينا هل اصول عسب نظل محافظين عليها في محتوانا العائلي على اقل تقدير

    تحياتي اختي

  16. سالم الامــارات كتب:

    lil.D

    إذا انت تتنقد على الذبايح، شتقول عن اللي عيالهم مايعرفون يمسكون الفنيال؟

    كلام كبير قلتيه، وصحيح كلامج ان نبدا في بيتنا واصدقاءنا واضيف بعد اهتمام اكثر من الاعلام على هل جانب وان شالله بتتعدل الامور للافضل
    خصوصا ان نحن وااااااااااااااااايد نتاثر بالاعلام

    تحياتي ليل والله الله بالرجيم لول

  17. سالم الامــارات كتب:

    ود القلوب

    ( احسك كاتب الموضوع من أعماق قلبك :d )

    اعماااق قلبك ؟؟؟ شو محييييط قلبي ولا بحر !! زين عسب اسير الحداق اصيد سمج لوووول

    بالفعل اضفتي نقطه حلوة الي هي المفهوم الخاطئ للتطور عند شبابنا وبناتنا مال اول …..
    بس منو المسؤول عن هل شي !! الاهل !! اختلاف الطبع والعادات اصلا في البيوت هني المشكلة

    تسلميلي ود ودمتي بود

  18. سالم الامــارات كتب:

    مظلومة

    اقوولج ترل ليل بنية مب رياال لووول بس حبيت التنويه

    تسلميلي مظلومه وربي ينصفج من الظااالم لول

    تحياتي

  19. سالم الامــارات كتب:

    سعود

    الاجانب والغرب لهم دور وبعد الاصول في هل عادات وانك تغرسها في عيالك تلعب ولااااعبة دور كبير للاسف

    تسلملي سعود ع وجووودك وياي ومرحبا فيك عندنا الغالي

    تحياتي

  20. سالم الامــارات كتب:

    بوسالم

    لو كنت اعرف ان حذف الرد جي بيخليك ترد جي كان من زماااااان حذفته لول

    تسلملي بو سالم يا نائبي لوووول

    تحياتي

  21. الهادئه كتب:

    السلام عليكم ورحمة الله وبركاته,,,يسعد ايامك بكل خير اخوي سالم

    صراحه موضوعك يضرب على وتر حساس لانه من وجهة نظري مو مجرد هويه وبس,,هي عاداتنا تقاليدنا قيمنا تعاليم دينا,,كلها الان للاسف تحتضر بسبب ايش؟بسبب الحضاره العولمه التقدم التمدن التطور,,,طيب ايش الي يمنع انه يكون عندنا كل هالاشياء بس نكون متمسكين بهويتنا ودينا وعاداتتنا,,
    اخوي سالم صدقني حتى عندنا بالسعوديه ماعاد الوضع مثل قبل اذا شفت شلون الشباب والبنات يبدعون باعمارهم اقسم بالله يضيق صدري واقعد افكر هذولي شلون رح يكبرون شلون بيفتحون بيوت وش القيم الي بيعلمونها عيالهم وش الجيل الي رح يطلع منهم للاسف شبابنا وبناتنا احين كل همهم مظهرهم وبس الا من رحم ربي وطبعا السبب في هلشي الاهل لانهم القدوه,,اخوي سالم شوف كيف اجدادنا ربوا عيالهم كانو اميين ومع ذلك طلعوا المدرس والمهندس والدكتور الى مالا نهايه,,هل كانوا يسافرون للخارج هل كانوا يدخلون النت هل وهل …؟؟كانوا من بيتهم لشغلهم المتواضع والمسجد,,
    بالنهايه حلوه الحضاره حلوه المدنيه لكن لايطغى على الاصل,,
    صدقني اخوي سالم كل شي بهالزمن صار صعب,,,ودي اكتب اكثر بس احس اني طولت بالكلام,,واشكرك كثيييييييييييييييييييييير على هالموضوع وطبعا لازم نبدأ بأنفسنا أول,,,
    تحياتي لك اخي العزيز سالم………………………………مـهـا

  22. سالم الامــارات كتب:

    الهادئة

    تسلمييييلي اختي كلامج صح هل شي بدا يغزي كل الخليج بس عندنا اضح امبين اكثر بس بصيركم يجرفكم التيار

    تحياتي مها

  23. مرحبا السأع ,, ش أحوالك ,, سالم ترا قاعده احاول أتكلم إماراتي ,,,
    بصرأحه موضوعك قيم وله هدف وتذكير للحأظر بما كان في الماظي
    وحأبه أشكرك على كلامك الرائع عن السعوديه تسلم والله والكل فيهم خير
    وانا بالعكس اشوف ان الامارات جدا جدا متمسكين بعاداتهم لدرجه كبيره بس ماادري يمكن هالشي اللي اشوفه بالتليفيزيون يكون العكس بحياتهم الطبيعيه ..
    تحياتي

  24. سالم الامــارات كتب:

    عبرات انثى

    لوووووووووووووووووووووووول عيبتني مرحبا الساع لووووووول زين ساع ولا دقايق لوووول
    التمسك موجود اختي … بس مب شرات قبل …والشي الرئيسي من طرحي ان في بعض دولنا الخليجية الي المواطنين الي اصولهم مب من شبه الجزيرة مب قادرين يعرفون اشياء وايد في عاداتنا واعرافنا لان محد علمهم ولا حد رباهم عليها في بيوتهم ….فاتحصلين الواحد يجلس في المجالس لا يعرف اداب الجلوس ولا الكلام …ومايعرف كيف يتصرف …ولا يعرف قيييمة الكلمة عند الرياايييل …يعني بمعنى ااخر خفييييييف …لنفسه ويخف بلده وياه

    تسلميلي عبرات وماقصرتي ع وجودج الغالية

  25. اجابتي وحدة لا غير

    المجتمع الاماراتي مجتمع مخلوط……

    اوووووووووكي ماختلفنا فيه وايد مجتمعات مخلوطة

    بس

    الامارات فيه الوافدين اكثر بوااااااااااايد عن المواطنين ………

    واصل المواطنين قليل ….

    يعني اذا شفنا منو هم الاماراتيين بنحصلهم قلة …

    ومن هالقلة

    اغلبهم يمنيه وعجم وعمانيين……..

    ومثل ما قلت … عادات عمان والسعودية بعدها باقية لانهم ما تعرضوا للاختلاط الكبييييييييييييير والتغيير الجذري في اصول الناس !!!

  26. سالم الامــارات كتب:

    ابنة الاسلام

    تسلميلي يا اختي وماقصرتي ع اذافتج الحلوة …
    انتي ماشاالله تختفين شهرين واتردين باجمله ع كل المواضيع !! لول