عيديتي هي سوالف وفيديو سفرة استراليا

Posted: 30 سبتمبر 2008 in الحياة حلوة
الوسوم:

في البداية احب اقولكم كل عام وانتو بخير وعساكم من عوادة العيد

صراحة انا حبيت احط تدوينة مختلفة عن كل سنه في العيد، وفكرت اني اربطها بالعيد وبعض سوالف السفر من خلال عرض لبعض لقطات من الفيديو والسوالف المرتبطه فيه على امل انه يكون شي حلو ويعجبكم ان شالله

يوم كنت في الطيارة مهره كانت تسالني، بابا الطيارة تمشي قلتلها ايوا، قالت لا ما تمشي !! وين البنايات والسيارات ماجوف شي يتحرك !!!؟ لووول عقب شوي جااافت الغيوم برع الطيارة ،،، جان تقولي بابا جوف جوف شعر بنات ابيض !!!؟ ليش مافي شعر بنات وردي !!؟ لووووووووووووووووول

هذا جبل الثلج في ملبورن عواش ومهره تزحلقو من فوق، ويوم وصلو تحت طيرو وياهم حرمه كانت تشرب كوفي وحليلها عوروها وخشمها استوى احمر لووول صج عيالنا محد يوديهم مكااان لووووووووووووووووووول وشي فيديو ثاني يوم وصلت تحت اخترقت الحاجز الي بتشوفونه وطحت وراه بس ما حطيته عن انقرض لول

هذا منظر في اقصى جنوب استراليا في مدينة ملبورن وهل مكان يعتبر سكن واعشاش للبطريق ، يعني وقت الغروب مئات البطاريق اتيي هل مكان عسب تسير اعشاشها وكانت تجربة حلوة اني اجوف البطريق يمبي وفي موطنه، بس للاسف ما رمت اصورهم عشان ممنوع والله قهر، المهم وقبل ثلاث شهور سائحين باكستانيين زلقو من فوق وطاحو في البحر ولين يوم ما سرت انا ما كانو محصلين جثثهم !!؟ لول

هذا الكنغر وهو ياكل وينط وطبعا هل نوعيات اليفة بس في انواع من الكنغر تعتبر خطيرة وتهاجم الانسان حتى ان مصرح لهم انهم يذبحونها وياكلوونها لول، منو يعرف كيف طعم الكنغارو !!!؟ طعمه نفس الغزال يعني سكري شوي واللحم نفسه بعد تحسونه متماااسك لول

هاي شخصية سكوبي دو الكرتونية وهي ترقص بين الاطفال

احد الاشياء الي ماعيبتني هناك ان الافلام ماتنزل بسرعه عندهم ؟؟؟ يعني في الفلم ينزل عندهم في السينما بعج شهرين من ينزل عندنا ،،، فيوم سرت هناك ماشي افلام يديدة خصوصا في جولد كوست وبريسبن،،،، بس يوم سرت ملبورن نفس السالفة ماشي افلام لكن كان نازل فلم هندي يديد، قلت حق عمري الجود من الموجود لووول فجفت هل فلم ، ويوم يت هل غنية كل الهنود والانجليز الي كانو في السينما قامو يرقصووون !!!؟ والله ما امزح وكانهم حاضرين العرس وياهم لول

اخليكم ويا الفيديو وكل عام وانتو بخير ^_^

تحياتي

Advertisements
تعليقات
  1. الحلم الوردي كتب:

    مرحبا سالم اشحالك
    عيدك مبارك

    ماشاء الله على العيدية عيدية مميزة ولا مرة حد عيدني عيدية راهية جيه لوووول

    ع فكرة و لا فيديو طاع بشتغل عندي ما عدا الاخير

    بي رايت باك ان شا الله
    بشوفهن واعلق

    تحياتي

  2. أميره كتب:

    هدية جميلة اخي سالم

    تسلم ..

    كل عام و أنت بخير

  3. سالم الامــارات كتب:

    الحلم الوردي

    الله يبارك فيج ومن العايدين ان شالله، وعساه يكون عيد خير وبركة علينا كلنا ان شالله
    زين عيبتج العيدية عشاني ما اعطي عيدية فلوس متاثر بمسلسل شحفان القطو لول

    انا حاولت اعدل في الفيديوهات واشتغلو وياي ان شالله ترومين تشغلينهم الحين ولو ما صار بليز خبريني

    بتريا ردودج ونبي شوي من طبخاتج الحلوة ^_^

    تحياتي

  4. سالم الامــارات كتب:

    اميرة

    الله يسلمج اميرة وكل عام وانتي بخير وعساج من عواده

    وتسلميلي ع مرورج الطيب

    تحياتي

  5. ShLaLaT كتب:

    عيدك مبارك

    وعساك من عواده

    🙂

  6. WarD JoOrY كتب:

    كل عام وأنتم إلى الله أقرب ـب ..

    وعيدكم مبارك ـك ^_^ ..

    ثانكسس سلوومز عالفيديوزـز ..

    وربي يحفظ لك بناتك ـك ..

    See Ya Soon =)

  7. مهرة كتب:

    الســلام عليكم ورحمة الله وبركاته

    عيدك مبارك أخويه سالم الإمارات

    ربي يخلي لك بناتك يارب العالمين وحفظهن ..،،
    أحلي فيديو الثلج .. وحليل الحرمة طااحت زين ما ضربة البنات 🙂

    ومنظر جنوب استراليا جداً حلو .. أن شاء الله تكون لي فرصه أشوف مثل هل مناظر في الطبيعة .. هب من خلف الشاشات 🙂

    وربـي يحفظـ الجميع ويرزقكم رضي الرحمــن

  8. الحلم الوردي كتب:

    مرحبا اخوي سالم

    يعطيك العافية اشتغل الفيديو عندي
    ماشاء الله عليهن ياربي يحفظ لك البنوتات

    صدق والله محد يودي عيالنا مكان
    ماادري ليش مع انهم كلهم براءة و يتعاملون بعفوية
    بس سبحان الله الا ما يسوون شي و يفشلونك

    خخخخخخخخخخخخخخخخ

    فديت عيالنا و الله عليهم حركات بس جنان والله ربي يحفظهم
    خاطري اروح استراليا ماشاء الله الطبيعة حلوة عندهم

    طلبناك عاد لاتردنا تذكرة سفر لاستراليا على حسابك الخاص
    عيدية حقنا انت كريم ونحن نستاهل

    و لا تحاتي الاكل انا بسده
    لووووووووووول

    يعطيك العافية

  9. 3washy كتب:

    السلام عليك اخويه …

    اولا كل عام وانت بخير و عساك من العايدين اخويه ..

    ثانكس على هالفيديو الصراحة وناسه لول ..

    ياااي فخاطري اشوف فيلم هندي و اروح السينما 😦 بس منقوووووووود عندنا بيقصون راسي … 😦

    انزين عيبك الفيلم و القصة حلوة ولا لا ؟؟ و اهم شي البطله حلوة ولا لا؟؟ >> ماحب اتابع اي فيلم الا اذا كان البطل والبطله حلوين خخخخخ

    تحياتي لك

  10. بـــو ســـالــــم كتب:

    ذكرتني بالرمله يوم شفت الثلج يا سلام تقريبا ما شيء فرق وايد الرمله احسن انحن عندنا ضب وجمال وانغرز نستمتع في الحفر يوم انغرز هم ما يرومون يغرزون يطلعون بسرعه لووووول و الله ما في مثل البر وعلى الجيب يا ويلي

  11. السلام عليكم والرحمه أخوووي سالم ..

    أشحاالكـ .. ربكـ بخيـــر ..

    وكل عام وأنت بخير وصحه وعساكـ لربكـ أقرب ..

    ومشكوور على العيدية ..

    ههههههه والحليله مهاري شافت عيل اتقول شعر بنات أبيض لووووول
    وما شاء الله عليهن والله يخلهم ..

    الصراحه تسلم على الفديوو رووعه بس فديو الكنغر ما فتح ..

    كله كوم والاغنية الهندية كوم الصراحه حلوو تشجع الواحد يربش ما اتخيل المنظر الكل يرقص ههههه

    مشكووور على الفديوو مره ثانيه وان شاء الله دوم هالوناسه

    تقبل مروري

    مظلومة سالم

  12. سالم الامــارات كتب:

    Shalalat

    الله يبارك فيج ويعوده عليج وعلينا بالخير ان شالله

    تحياتي شلالات

  13. سالم الامــارات كتب:

    Ward Joory

    وانتي بخير يا ورد وان شالله تكوني وزعتي وردج كله في العيد لول واتغيرين من ورد جوري الى ورد عباد الشمس لووول

    تيك كير

  14. سالم الامــارات كتب:

    مهره

    الله يبارك في حياتج مهره

    طيحت الحرمه هاي ولا شي !!؟ ما شفتي طيحتي انا !!!؟ يت وحده من فوق ومالمحتها …ماجوف عمري الا طاير في السما وطايح على ظهري !!!؟ لول وكنت اصور بعد الناس اوني جان اصور نفسي لوول …

    وان شالله ربي يسهل عليج واتشوفين الي احسن من هل مناظر يا رب لانج جد تستاهلين كل خير

    تحياتي مهاري

  15. سالم الامــارات كتب:

    الحلم الوردي

    منو البراااءة !!؟ ومنو العفويين عيالنا !!؟ حررااام عليج ….سيري اي مول او اي حديقة او العاب اذا سمعتي صوت صياح ومشاغبة فاتاكدي انهم مواطنين او خليجيين لول

    والله اتشوفين عيال اليابانيين والاجانب وحليلهم كتااكيييت ونظيفين …بس عيالنا مستحيل مايكوون في رمل في ملابسهم !!؟ لا والقهر يوم اتكونين تمشين ويطيحون عالارض في نص الشارع ويصيحون !!!؟ صج يقهرووون لوووول

    فاااااااااااالج الطيب تم والله مب استراليا وبس انا احتمال اسير باكستان شو رايج تسيرين بدالي واعطيج الفرق لوووووووووووووووووووووووووووووول
    افا عليج الحلم الوردي كم حلم عندنا …اسميج انتي داشة ع طمع هاااه لوووول

    تسلميلي ورد وربي يحفظج ان شالله

  16. سالم الامــارات كتب:

    عواشي

    مب مشكله افتحي قناة وي ارابيا وتابعي افلام هندية مافيها شي لول ….ولا تدرين وقفي عند باب الشارع وطالعي بتشوفين هنود وايد الا بتتابعين قصة حب بين احد الخدامات وراعي البقالة او بياع الجرايد لول

    هييه عيبني الفلم …وفيه 3 بطلات مب وحده لوووول والبطل حلو يشبهني شوي لووووووووووووووووووووووووووووووووووووووووول

    تخياتي عوييش

  17. سالم الامــارات كتب:

    بوسالم

    يا سلااام على وصفك بو سالم …يعني مش عاجبك الثلج ماشالله !!؟ لوول مب منك من الجيييييب ….قلنالك خلنا نستخدمه في عوافي عالعيد ماطعت ….خليه مطربل احسلك لول

    تحياتي

  18. سالم الامــارات كتب:

    مظلومة سالم

    اشحالج مظلومه ….انتي بعدج مظلومة سالم لووول …ماما سويتيلنا شاشعات الله يهديج لووووووول

    ويين هل غيبة؟؟؟؟؟ عسى المانع خير ان شالله

    سالفة شعر البنات ولا شي اقولج كنا في المطار في سنغافورة …جان اجوف ياهل سنغافورية مسلمة …حاطينها في العريانه اهلها وملبسينها حجاب اندونيسي …شكلها كيوووووت …جان اقوول الله حلوة ….يات مهره شافتها جان تقول …مممم بشكااارة !!!!!!!!!!!!!!!!!!!!!!!!؟ لووووول اونه اندونيسية

    تحياتي مظلومة ولا تقطعينا

  19. 😦

    ما شتغل شي عندي مووووول

  20. حلوووووووووووة البنات كتب:

    السلالالالالالالالام عليكم
    احلا عيديه صراحه حد يشوف هالويوه الحلوه والبنات العسل ويقول عيديتك مب حلوه؟
    الله يحفظهم لك انشالله .مناظر حلوه وايد واهم شي البنات انبسطوا وانشالله الله يوعدني ونشوف هالمناظر الحلوه.

  21. سالم الامــارات كتب:

    ابنة الاسلام

    سييري صلحي اللاب مالج لوووول شكله طابوقه بازرار مب لاب لول

  22. سالم الامــارات كتب:

    حلووووووووووووووة البنات

    تسلميلي اختي ويخليليج عيالج اذا عندج واذا ماشي يخليلج عيال الجيران لول
    بس عيبتني كلمت انبسطوا ….شكله في عرج مصري موجود لوووووووووووووووووول

    تحياتي

  23. الحلم الوردي كتب:

    انت عاد لا تفضح عيالنا قول انهم ايننون وخل الباقي على اهلهم لووووووووول

    اكره شي عندي يوم يعزرون يبون شي و ما اطيع تعطيهم اياه على
    طول ينسدحون على الارض و يصارخون طبعا رواعي البريستيج ما ينفع يشلون وياهم بهال و يروحون اي مكان عام لان محد شرات عيالنا ماشاء الله يقدر يحافظ على بريستيجنا لووووووووووول

    لو يسوون ما يسووت بيتمون جنة يف عيوننا ربي لا يرحمك من عيالك يارب
    بعدين خف على العالم ما امخلي حد الا و قارضنه لووووووووول

    بعدين انا ما ابا باكستان شو قالوا لك ليلام بروح ستلم بضاعتي مناك وبيي
    ما نبا خلاص معذرين

    *_*

  24. سالم الامــارات كتب:

    الحلم الوردي

    ذكرتيني والله بايام اللييلااام …ذكريااااات والله ..ييوووون عند الباب وامي وخالتي ونحن نوقف ونختتار واننقي …يا سلااام حلاتها من ايام والله … هذا غير يوم نهف منهم الاغراض ونشرد

    بس والله فكره حلم شو رايج انسويه مشروع انا وانتي !!؟ صدقيني بنستفيد لول مشروع ليلام …ونستغل مدوناتنا انسوي دعاية للبضاعه …. يا سلااام لول وانغير اسمج من الحلم الوردي الى الحلم الليلامي !!!؟ وانا سالم اللييلااام …. يا عيني والله لوووووووووووووووووووووووووووووووووووووول
    فكرة صح ^_^

  25. lil.D84 كتب:

    يمكن النت مشفر عندي قبل هب مطلع الفيديو
    بس اليوم شفته
    جنااان البوست 🙂
    ضحكت من خاطر يوم شفت الحرمه اطيح
    “اول مره ما استوعبت ثاني مره بعد ماقريت الكلام زين استوعبت”
    ذكرتني باختي الله يهديها مره جربت تتزحلق جيه ودخلت فسور عند بيت ناس كسرته
    لووول

    ماشاء الله عليكم 🙂 ودي ازور مكان البطاريق شكله وايد حلو!

  26. الهادئه كتب:

    مرحبا اخوي سالم في ثاني صفحه اقراها,,وهذي الصفحه بالذات السبب اني تعرفت على مدونتك,,طبعا سالفه طويله اقولها لك بعدين (:

    ربي يحفظ لك بناتك ويقر عينك بصلاحهم وتذوق نفعهم وبرهم يارب,,,

    طبعا استراليا مررررررره حلوووووووووه انا رحت لها قبل كذا وكانت اجمل رحله بحياتي,,

    بس بقولك شغله صدقني مافيه احلى من الاطفال وشقاوتهم صح احيانا يفشلونك بس يبيلك تطول بالك عليهم,,,وبعدين الغلطه مش غلطة مهره وعواشي غلطة الحرمه واقفه بمكان غلط (:

    آه يازين استراليا ودي اروح لها مره ثانيه ):

    تقبل مروري وتحياتي اخوي سالم,,,يحفظك ربي,,,(مها)

  27. سالم الامــارات كتب:

    lil.D84

    هيه والله وايد حلو مكان البطاريق

    القهر ان ممنوع التصوير
    حاولت كذا مرة ماقدرت …يقولج لو زخوني يشيلون الكاميرا كلها …..مافيني الصور تضيع

    عاد انتي ضحكتي يوم الحرمه طاحت ….ماشفتي يوم انا طحت شو صار !!!؟ كنت اصور وماشوف نفسي الا طاير بالهوا وكله متسجل بعد لووووووووووول ….بس مافيني عالفضايح واحطه لول

    سي يا

  28. سالم الامــارات كتب:

    الهادئة

    صج !!! هل بوست السبب !!! زين خبريني كيف؟ فيني فضول ابي اعرف لوووول

    اصلا انا اموت في اليهال واحب مشاغبتهم وشقاوتهم ….لانها صج لها طعم ولذه ثانية … واسللي الي ماعنده عيال ومحروم من هل نعمه بتعرفين قيمتها صج لوووول …

    انا رحلة استراليا اعتبرها من افضل رحلاتي العائلية لاني اكتشفت فيها اني ايش كثر كنت بعيد عن اهلي ومنشغل في مشاغيل الدنيا … وان شالله بقدر اعوضهم الحين عن هل شي

    قابلت ناس هناك من الامارات ما عيبتهم استراليا !! مادري ليش ….بس كلا بذوقه ومزاجه …
    ومرورج مقبول فيه اختي وجد اسعدنا واااااااااااااااااايد

    بس خبريني السالفة كيف عرفتيها المدونة؟ لول

    تحياتي

  29. الهادئه كتب:

    مرحبا اخوي سالم,,طولت غيابك انشالله انك بصحه وعافيه اخوي,,

    ابشرك قرأت مدونتك كلها حرف حرف (: ___ اكثر شي عجبني غيرتك وحميتك شقاوتك ايام الدراسه مواقف ربعك في الجامعه سفراتك تصويرك المواضيع الي تكلمت فيها فعلا تلامس الواقع بشكل كبير البنات وعرض ازياء العبايات انعدام الخصوصيه بارقام اتليفونات وفعلا كل من هب ودب صار يعرف كل شي عن البنت برقم تليفونها ……….باختصار مدونتك رائعه…

    بالنسبه كيف تعرفت على مدونتك بقولك كيف وبحاول اختصر,,بس شو يعني بوست ماعرفته (: _________وبالنسبه للاطفال وجودهم بحياتنا نعمه ورضا من ربنا(انا عندي 4 بنتين و ولدين)
    بقولك شي ولاتستغرب انا اول مره بحياتي ادخل النت والانسان ماينولد عالم وكنت قاعده استكشف العالم الغريب بالنسبه لي وحبيت اشوف شو فيه مكتوب عن استراليا وحطيت بالقوقل قولد كوست استراليا طبعاكانت رحلة سالم الامارات من ضمنها حطيت عليها وتفاجئت بشي اول مره اشوفه الي هو المدونه كان شي غريب بالنسبه لي وحبيت ارسل مسج تجريبي عشان اشوف شو السالفه وهل بتشوف المسج هل بترد علي وكان اول مسج ارسله عبيط شوي (:
    بس بعدين البركه فيك فهمتني السالفه (:
    شو رايك بقصتي تصلح فلم هندي صح (: ____وصدق المثل رب صدفه خير من الف ميعاد…السموحه منك اخي العزيز على الاطاله…
    بالنسبه لاستراليا رحتها قبل سنتين مع عائلتي وكانت من اجمل رحلاتي,,وشفت عوائل اماراتيه كثير وحسيت اني بدبي وكانت معانا بالرحله الشيخه موزه بنت حمدان كانت قمه في التواضع الله يحفظها…….احسن شي اوقف عن الكتابه الحين لاني مارح اخلص (: _______السموحه مره ثانيه على الاطاله,,,,تحياتي اخوي العزيز سالم ربي يحفظك

  30. سالم الامــارات كتب:

    الهادئة

    الله يسلمج ويحفظلج عيالج اختي هادئة مع اني مرة ماشوفج هادئة لوووووول

    مب عيب ان الواحد مايكون عارف النت او اي شي ثاني …العيب ان الواحد مايحاول يتعلم …ومبين عليج مدى طيبة قلبج وان الي في قلبج على لسانج ….ربي يخليج لرايلج وعيالج

    البوست يعني الموضوع المكتوب لوووول

    واذا شفتي في مدونتي على جهة اليمين بتشوفين عنوان اصدقائي ….هذيله كلهم مدونين ويكتبون في عالم النت …ترومين تزورين اي حد منهم وتقريلهم كلهم وان شالله تستفيدين من الجميع مب بس سالم الامارات لول

    انا استراليا كانت سفرتي الاولى وعزمت ان النه الياية اسيرلها بعد …بس شكلي يالس اميل صوب امريكا بس بحاول اقنع اهلي كلهم الله يعيني لول

    انزين باقي تخبريني سالفة البحر ….ماقلتيها؟ لول

    تحياتي يا موج البحر لول

  31. الهادئه كتب:

    الله يسعدك اخوي سالم,,فعلا صحيح فيني طيبه لدرجة الغباء وياليت القى لها دواء لان الطيب بهالزمن ماياكل عيش,,
    اخوي سالم صدقني اني هاديه بس صفحاتك فجرت المكبوت فيني,,احيانا تحتاج شخص يسمعك بس يفهمك يمكن هذا لي لقيته بمدونتك وميزها عندي عن الباقي,,انا مريت على اغلب المدونات الموجوده بصفحتك وبصفحات الباقين,,
    بس انا ماقدر اكون مشتته لاإلى هؤلاء ولا إلى هؤلاء,,,,
    انا يوم قلت انك مثل البحر مو قصدي انك غامض لأ بالعكس بس كنت أقصد إني حاسه انك مثل البحر مره يكون هايج ومره يكون هادي طبعا حسب الموضوع الي تكتب فيه احس انك مثل البحر لان فيه اشياء بااعماقك محد يقدر يوصلها ممكن تكون اشياء حلوه او حزينه ماعرف بس احسك بحر,,صح كلامي ولامجرد تهيوئات؟
    بالنسبه لامريكا انا رحت نيويورك وسياتل ولوس انجلس وكانت هي احلاهن فيها يونيفيرسال استوديو مره حلو طبعا بيفرلي هيلز وديزني الي مره حبيتها,,,
    طبعا انا قد مااقدر قاعده احاول اختصر (:

    تحياتي لك اخوي العزيز

  32. سالم الامــارات كتب:

    الهادئة

    لوووول صح كلامج اختي مب تهيؤات …ماشالله عليج طبيبة نفسية لول

    خلاص اذا بسير امريكا بستعين فيج ان شالله في المناطق لول وان شالله لي زيارة جريب للرياض بستعين فيج عسب تخبريني عن اماكن التسوق لول

    تحياتي

  33. الهادئه كتب:

    السلام عليكم ورحمة الله وبركاته,,,يسعد صباحك ومساك اخوي العزيز سالم
    ههههه لأ اخوي أنا مو طبيبه,,بس اكيد تعرف شي اسمه’’ التلي باثيك’’مارح اكمل (:
    خلاص اذا بتروح امريكا رح اقولك شو الاماكن الي تروحها,,,واذا بتجي الرياض ياعسى ربي يحييك تنور الرياض بحضورك وابشر بالي يرضيك ويسر عينك وبخبرك بعد عن الاماكن الحلوه عندنا,,على فكره اخوي سالم انا ارسلت لك ايميل بس ماعرف اذا شفته او لأ,,
    تحياتي اخوي

  34. سالم الامــارات كتب:

    الهادئةان شالله سفرتي بتكن حلال شهر ا شهرين بس يا جده يا الرياض ان شالله بعطيكم خبر
    ماصلني شي من صوبج اختي

    تحياتي

  35. و أخييييييييييييييييييييييييييرا شفت الفيديو ……..

    والله ضحكت ع اول مقطع ……..