فتيات اماراتيات مقيمات بالايجار

Posted: 11 سبتمبر 2008 in مشاكل تحتاج حلول
الوسوم:

 

كثير منا يعلم ان الوضع المادي والمعيشي في بعض اماراتنا الشمالية اقل بكثير لما هو حال المواطنين والمقيمين في دبي وابوظبي على وجه الخصوص، وهذا الامر اجبر الكثير من البنات الى الذهاب الى هاتين الاماراتين والعمل والاقامة هناك.

المشكلة وين؟؟؟؟؟؟؟؟ المشكلة ان الكثير منهم يقيم في سكن لوحده ومن دون محرم او حتى شريكة معها ؟؟؟

بصراحه سبب طرحي لهذا الموضوع هو كثرة عدد هذه الفئة من المواطنات نظرا لضيق المعيشة وخروجهم للقمة العيش، تصوروا بنت تعيش بعيدة مئات الكيلو مترات عن اهلها ولوحدها ،،، وفي زمن صار من المستحيل ان تخرج بنت من بيتها لمكان عام من دون ان تتعرض لمعاكسة او موقف تحرش بها؟؟؟ كثير من الحالات اللي شفتها جدامي للاسف ساروا في طريق غير صحيح؟؟

طبعا الكثير منهم وقع في جراثم الذئاب من الشباب والمستغلين لوحدتهم بعيدا عن اعين اهلهم وعدم وجود اي رقيب او عتيد عليهم، الكثير منهم للاسف اصبحوا من اصحاب السهرات والمقاهي والشيش الليلية بصحبة احد الذئاب الذي استطاع ان يضع مخالبه على هذه الورده البريئة، مستغلا لبراءتها وحاجتها وضعفها

والبعض منهم يقيم مع احد هؤلاء الشباب ايضا من دون علم الاهل؟؟؟؟ يعني بوي فريند؟؟؟؟

هذه الظاهرة يجب ان نقف عندها، يجب على الدولة والجهات المختصة ان تتخذ الاجراءات اللازمة نحو هذا الامر، وانا اقترح ان يتم توفير سكن خاص لهذه النوعية من الفتيات من الذين يعملون في امارة غير امارتها، لان صدقوني هذا الموضوع لو لم يتم حله سوف تكون اتباعه كبيرة وسلبيه على الكثير من العوائل الاماراتية وعلى المجتمع الاماراتي وعلى فتاة الامارات قبل كل شيء؟؟؟؟

الموضوع قد يراه البعض بسيطا او يعتقد بانه ليس ذو علاقة به ،،،، بس ماتعرف او تعرفين يمكن بيجي اليوم اللي تكون زوجتك او بنتك او اختك او احد افراد عائلتك يتعرض ويعيش هذا الوضع!!؟

اتمنى ان يصل هذا الصوت لاصحاب الشان ليلم مايمكن لمه

تحياتي

Advertisements
تعليقات
  1. 3washy كتب:

    السلام عليك اخويه سالم ..

    ماشاء الله عليك موضوعك جريء و طرح مميز ..

    اولا اخويه يلجأ الكثير من البنات و الشباب من الامارات الشمالية للعمل في دبي و ابوظبي ليس فقط للوضع المادي والمعيشي .. انما لتعدد فرص العمل في هاتين الامارتين و قلة فرص العمل في باجي الامارات …….

    و ثانيا اخويه البنت اللي تعيش روحها في شقة وين اهلها عنها !! وين ابوها ..اخوها ..عمها ..خالها ..!!! وين امها !!! كيف يتركونها حتى لو كانت في شقة مع شلة بنات !!

    على ما اظن اخويه اذا كانت بنت ناس ماظن راح يخلونها جيه حتى لو ظروفهم صعبة .. ماظن احد يرضى يخلي اخته او بنته ف امارة بعيدة من دون رقيب يعني معقولة ما ينشدون عنها بين الفترة والثانية و يزورونها في مكان اقامتها !!

    الا اذا كانت البنت بايعة عمرها من الاساس ( واسمحولي على هالكلمة ) وطالعة عن شور اهلها تسوي كل شي ..ولا تقول- وردة بريئة – اخويه ترا في زمنا ماشي وردة بريئة كلهن واعيات و عاقلات يعرفن كيف يتصرفن .. هي اللي اختارت هالطريج وهالخراب وهالوضع لنفسها .. انا مالوم الشباب اذا استغلوا البنات والصراحة الصراحة البنت هي اللي تستغل الشاب .. شو تبي بعد واحد يصرف عليها و امسكننها على حسابه و لا بعد اكيد متعرفة على مليون وكلهم يصرفون عليها .. وتقول وردة بريئة (قهرتني هالكلمة والله )..!!

    مابي اكون قاسية في كلامي اكيد مو كل البنات جيه ..وشي بنات زينات و محترمات .. يعني مثلا وحدة من ربيعاتي كانت تشتغل في بوظبي بس ساكنه مع اخوها ف شقة يعني مب روحها .. و شي وحده بعد تشتغل وياي في دبي و هي من الفجيرة و ساكنه ف دبي ويا بشكارتها ..الصراحة اهي بنت ناس معروفين و ما شاء الله عليها دين و اخلاق عمري ماشفت وحده شراتها ما شاء الله عليها .. وغير جيه اهلها يزورونها خلال الاسبوع مايخلونها روحها و في الويكند ترد الفجيرة …

    وفي النهاية اقول اهم شي في البنت شرفها و سمعتها .. واذا كانت مع شلة بنات سمعتهم مب زينه راح تكون مثلهم لان الخير يخص والشر يعم .. واللي تبي تسكن بعيد عن اهلها لازم تدور الصحبة الزينه او تخلي احد من اخوانها يسكن معاها …

    وانا معاك فاللي قلته لازم الجهات المختصة تهتم بهالموضوع ويوفرولهم سكن مع مراقبة تصرفات البنات.. او يكثفون التحريات في اماكن سهر الشباب والمقاهي والشاليهات ..(اتخيل الصراحة يشوفون بنت في الشيشة و يوقفونها يقولولها وين اهلج هههههه)..

    ربي يهدي الجميع ويستر عليهم ..

    والسموحة اخويه على الاطالة ..

  2. KaikA-MGroMa كتب:

    ambeeeh :\ 7raam mo 5osh salfaa

    inshalah tn7al ib agrab wagt.

  3. سالم الامــارات كتب:

    عواشي

    شكرا على الاطراء عويش
    صح كلامج ترى ضيق العيش بسبب قلة فرص العمل

    انا يوم قلت وردة بريئة لاني انظر بحسن النية ،،، محد يبي الخراب لنفسه الظرف، الصحبة، ضعف الدين، هي الي تدفعه لهل شي

    نحن هني مب عسب ننتقد هل فئة ،،، نحن نبي حلول لها ونتخلص منها وهي في بداياتها قبل لايفوووت الفوووت في اياء وايد !!؟

    واحيييج ع غيرتج اختي ع بلادج وبناتها
    تحياتي تسلميلي عالمرور

  4. سالم الامــارات كتب:

    كيكه مقرومه

    المشكلة مانعرضت او انطرحت اصلا عسب تنحل ،،،،، نحن طرحناها عسب ان شالله توصل وتنحل

    تسلمي يا كيكة ع مرورج الاول وزين ان فطرنا لا كنا كلييينااج لل تحياتي

  5. 3washy كتب:

    هلا اخويه ..

    منو قالك ان ماحد يبي الخراب لنفسه .. بنظري كل واحد عقله ف راسه و يعرف خلاصه… و بالنسبة لهم هالشي لي يسوونه متعه و يعرفون انه غلط بس لانهم تعودوا على هالنمط …

    و برايي اللي مايساعد عمره انه يتغير ماحد يقدر يغيره .. وهالفئة يبالهم سلطة اتوقفهم ^_^

    والسموحة

  6. بـــو ســـالــــم كتب:

    مرحبا سالم ما عندي الى مثل واحد والسموحه على المثل

    نام ياقطو والعب يا فار

    بوسالم

  7. حلوووووووووووة البنات كتب:

    السلام عليكم …..انا وصلت بالسلام الحمدالله على سلامتي
    الموضوع وايد مهم وما حد يقدر يحله الا ولي الامر بس شو بتسوي الجهات المسؤبه بتظل ادور وراء البنات؟؟؟؟؟ ياله من لقاله بنت ساكنه مع بوي فرندزززز؟؟؟
    لا طبعا المفروض الاب الاخ العم اي حد ذو قرابه بالبنت يتولى السؤال والمتابعه
    يعني مووووو معقوله الجهات اتسويلكم كل شي؟ يعني مو ناقص الا تاكلكم بايدها وتشربكم شي غريب والله.
    وبعدين كله على التربيه .التربيه وبس
    ومشكور على طرحك للموضوع .

  8. KaikA-MGroMa كتب:

    لووول .. بس ما فهمت يعني شنو عسب؟ :\
    D=.

  9. سالم الامــارات كتب:

    عواااش

    صح كلامج ومثل مايقولون الخير يخض والشر يعم لوووول

  10. سالم الامــارات كتب:

    بوسالم

    ع سالفة القطاوة ماتحس ان عدد القطاوة قل في الشوارع؟؟؟ اتحيد يوم كنت انت صغير واتزخ القطو من ذيله واتفره لووول ولا يوم قتلت الارنب وفريته عاليدار وابوي ضربك ضرب البلا يوومها هههههه لول

    اعتقد انك اشتقت للقطاوة من جي طريتهم

  11. سالم الامــارات كتب:

    حلوووووووووووووة البنات

    صح كلامج ما ناقص الا ياكلونا لول
    بس لا تسالين ان وضع الضوابط والنظر في بعض الامور قد ينقذنا من مشاكل اجتماعية واسرية كبيرة ع جدام

    تحياتي

  12. سالم الامــارات كتب:

    كيكة مقروومه

    ماتعرفين شو يعني عسب؟؟؟؟؟؟؟؟؟؟ لول حسستيني ان كلامنا غلط لول

    عسب يعني عشااااان ،،،عرفتي؟
    يبالج كورس فاللهجة الاماراتية

    تحياتي

  13. Sn3a كتب:

    تركيز التقدم العمراني والتنميه باماره دبي هو مادفعهم لهالشي
    وبوظبي معرووفه من قبل دبي ان مستواها المعيشي مرتفع

    الحاجه قويه ياخوي
    الحاجه اهي اللي تدفع بنت تروح تشتغل بعيد
    عشان تشبع اخوانها وتساعد اهلها بهالمصاريف

    الله يحفظهم وان شاءالله توفر الاماره لهم سكن بسعر مناسب على الاقل يتوفر الامن والنظام والاهل يتطمنون عليهم

  14. سالم الامــارات كتب:

    سنعه

    اتفق وياج الحاجه والظروف الصعبة هي الي تدفع البنت تسير بعيد عن اهلها
    بس مابنقول غير الله يعوضهم خير ويحفظهم من الشر

    ومثل ماتفضلتي لازم نوفرلهم سكن بسعر مناسب وتوفير نظام وامن في ذلك حتى يتطمن عليهم الاهل

    تسلمي سنعه ع وجودج وربي يحفظج

  15. ShLaLaT كتب:

    موضوع مهم الصراحه وجريء

    ليش ما يحطون مباني حق البنات فقط وعليها رقابه وحمايه ؟
    !!

    🙂

    واذا على المشاكل
    اتوقع اغلب المشاكل البنت تييبها حق نفسها

    وعلى قوله عواش كلهن عاقلات وفاهمات

  16. سالم الامــارات كتب:

    شلالات

    هذا هو رايي بان يتم توفير سكن لهم حتى لو بالايجار بس يكونونتحت العون والنظر ولا الخرااااابه صراااااحه …بس مثل مايقولون الي يعرف يعرف والي مايعرف مايعرف …والي مايعرف احسله مايعرف …عرفتي شي!!!؟ لول

    تحياتي شلالات …هااه رمتي ترقدين ولا بعدج محتاسه !!؟ لول

  17. لاحول ولا قوة الا بالله

    اعلم اخي , ان كانت ضروف الفتاه صعبه ومجبوره على ذلك فالدوله والمسؤولين سيتحملون نتيجة ذلك يوم الحساب
    اما اذا لم تكن مجبوره فهي من سيتحمل ذلك

    ثم اقف عند جملتك عندنا قلت اننا في زمن يستحيل الا تتعرف الفتاه للتحرشات ,,
    انا فتاه , واخرج احيانا اقضي مشاويري لوحدي
    ولا اتعرض لشي
    وحتى لو رجت مع فتيات , لا نتعرض للتحرشات
    غالبا الفتاه هي التي تسيطر على امر التحرش ,
    الفتاه المحترمه تفرض احترامها ولن سيتم التحرش بها ابدا
    اما الفتيات ذوات السبع طوابق فوق الرؤوس والفل ميكب والعباءه الفستان , طبعا ستتعرض

    انقلبت الايه 🙂

  18. مهرة كتب:

    السلام عليكم ورحمة الله وبركاته

    لاحوله ولا قوة إلا بالله

    اول مرة اعرف ان البنت يسمح لها تستأجر شقه خاصه لهن.
    إذا قلنا مبني كامل للبنات بنقول مب مشكله .. بس أن يسمح لها تستاجر شقه في فنادق ما قول غير على الدنياا الســـلااااام……

    المفروض لو كان هذا صحيح .. لازم الدوله تقف حاجز ع هل قرار وتمنعه
    وتقول ممنوع البنات يستأجرن شقق وحتي الشباب العزابيه المفروض يطبقون هذا القرار لهم ..،،

    حلوه هاي يخلون الأهل بناتهن يستأجرن شقق خاصه لهن هههههه وين عقولهم
    الدنيا خاربه من زمااان وخربونها أكثر مانقول غير حسبي الله ونعم الوكيل..،،

    وكل راعي مسؤول عن رعيته
    والأهل مسؤولين عن عيالهم
    والدوله مسؤوله عن شعبها

    وكل واحد منهم يوم الحساب راح ينسأل عن رعيته ..،،

    أختك في الله

  19. سالم الامــارات كتب:

    صوت البحر

    يا حي الله باختي العزيزة بودي شوب لوووووووووووووووووووول شخبارج عساج بخير

    ع قولتج انقلبت الاية لوول انتي من وين طلعتي ؟؟؟ لول

    عجبني تعليق بنات السبع طوابق ؟؟؟ قصدج بو نفخة او بلهجتنا المحلية جمبوووعه لووووووووول

    اذا ماتعرضتي لمواقف فهذا نعمه وخير من ربنا صراحه ولا الحييين وهل زمن صدقيني مب محال لول

    سررت بمروروج وانا اقول اشم ريحة العطور والدخون في المدونه احيييين عرفت من مين لول لول سمحتي لا تقلبين الايات مرة ثانية يا تاجرتنا العزيزة لول

    تحياتي

  20. سالم الامــارات كتب:

    مهره

    لا والله اختي هل شي موجود وبكثرة بعد وللاسف اصبحت تظهر منه ظواهر غير صحية ومشاكل الله لا يراويج بس للاسف محد يرمس فيها ومحد يبينها ليش مادري؟؟؟؟؟؟؟؟؟؟؟؟؟؟؟؟

    تحياتي مهاري وتسلمي ع مروروج الطيب ولا تقطعينا

    تحياتي

  21. mshehab كتب:

    والله هذي مشكلة
    كيف يخلونهم جي
    المفروض أهلها يزوجونها البنية

  22. والله هذي مشكلة
    كيف يخلونهم جي
    المفروض أهلها يزوجونها البنية

  23. سالم الامــارات كتب:

    دلوعة حبيبها

    اهم شي هل ظاهره تنحل اختي
    صدقيني انا مابطرح هل موضوع الا واني جايف اشياء غريبة وعجيبه استوت من هل شي؟؟؟ كم وحده راحت فيها وانقص عليها وضاعت بسبة بعد المتابعه وماشي رقاااابه ،،،،

    مثل ما في مناطق ممنوع فيها سكن للعزابية يساجروا ابراج او اماكن تابعه للشرطه او الجيش او المستشفيات تكون بس للبنات

    انا اعرف بنات يسكنون في سكن الطبيبا في العين وهم من الامارات الشمالية وكل يوم صاكيين خط لابوظبي والله رايح راد؟؟؟ بس هذا السكن بعد يالسات فيه لانهم يعرفون بنات هناك مب لكل حد

    الله مستعان ونحن دورنا انبين الي نجوفه والباقي لاولي الامر

    وبعدين الله يهديج وين يزوجونهم ؟؟؟ لو كان ياهم نصيب زين اكيد ماكان قالو لا لول
    تحياتي دلوووعه وسلميلي عالحبيب لول مثل مايقولون الحبيب مثل اكل الزبيب لوووول

  24. الحياة صعبه

    البنت الواثقه من نفسها مستحيل ينقص عليها

    اما المايعات ياكثرهن في البلاد وبكل سهوله ينقص عليهن خخخ

    الحل ماعتقد في هالزمن فيه حل

    بس اكيد بنحصل حل لها المشكله الكبيره ونا سمعت وايد بس ماش

    ماشفت بعيني

    والسموحه

  25. lil.D كتب:

    أخوي سالم، يقولك … الحاية بنت حرام … للأسف في كثير تدفعهم الحاجة ان البنت تروح وتشتغل في مكان ثاني … عل وعسى تقدر تسد من متطلبات المعيشة، خصوصاً لو كان عندها ظرف خاص، والله في ناس حتى اللقمة مب لاقين ياكلونها.

    بس في بنات، الله يهداهم، ياخذهم الحماس، والعمل، والمساواة مع الرجل، والمستقبل، والحياة الوظيفية، و و و و الخ !! .. كثير من هالكلام اللي أشوفه ماله داعي! … ماتقدر البنت تستقل عن أهلها … أو عن زوج يسندها!! … هاي الحجج الواهية هيه اللي بدت تدمر مجتمعنا.

    أنا ماكنت أعرف أن في بنات يباتون عشان الشغل في مدينة ثانية، الا مرة في منتدى وحدة كانت تدور وظيفة فيها سكن عمال!!! … كانت هاي أول مرة أعرف هالموضوع، ومر علي وايد بنات يروحون ويردون مدينة ثانية بنفس اليوم، أما السكن لا …. والحين انت صدمتني بسالفة البوي فرند >_< … !!!

    دينا الإسلامي فيه كل التشريعات! .. ليتنا نلتزم بس!
    والله لا يحوج أي بنت هاي الحاجة اللي تطلعها من بيت أهلها وحيدة!

  26. سالم الامــارات كتب:

    فهد العيناتي

    لا اخوي اختلف معاك ….انت ما سمعت المثل الي يقول كل مشكله ولها حل ؟؟؟ نحن مب مفروض نسكت ونقعد عن المشاكل وانقول مالها حل … لازم نرتب ونحوس ونخطط صح ونتوكل ع ربنا واكيد ربنا بيفرجها باذنه خصوصا اذا كان الشي الهدف منه التجنب عن الحرام وتسهيل حياة وامور خلق الله

    وتسلملي ع مرورك اخي فهد ويطولي ربي بعمرك

  27. سالم الامــارات كتب:

    lil.D

    انا وياج 100% فيما قلتيه ان للأسف في كثير تدفعهم الحاجة ان البنت تروح وتشتغل في مكان ثاني … عل وعسى تقدر تسد من متطلبات المعيشة، خصوصاً لو كان عندها ظرف خاص، والله في ناس حتى اللقمة مب لاقين ياكلونها

    ومثل ماتفضلتي بنات يسيرون ويردوم من امارة ثانية ….انا اعرف بنات يسيرون ويردوم من كلباء لدبي …ومن دبي لي بوظبي ….ومن العين لي بوظبي …. بس ماقووول غير الله يكون بعونهم اذا نحن الرياايييل مب رايمين عليها كيف هم؟؟؟

    اذا توافرت بعض التسهيلات والاحتياطات فترى مساله الانحراف تقل وبشكل كبيير … الواحد ياخذ احتياطاته وبعدين اذا صار شي فتراه من رب العالمين.

    ومثل ماتفضلتي دينا الإسلامي فيه كل التشريعات! .. ليتنا نلتزم بس!
    والله لا يحوج أي بنت هاي الحاجة اللي تطلعها من بيت أهلها وحيدة!

    وتسلميلي ع مرورج وماقصرتي ع مشاركتج الفعاله

  28. UTurnFashion كتب:

    الله يعينهم ويرحم بضعفهم يارب ..
    كثير الحياة تضطرنا نصارع الحياة ونكافح عشان لقمة العيش ..
    وكمان تستغل ظروف حياتنا أبشع استغلال ..

    كان الله في عونهم ..
    وجميل منك أن تسلط الضوء ع مشكلتهم..

  29. سالم الامــارات كتب:

    UTurnFashion

    تسلميلي اختي حنان والله ومرورج وايد اسعدني وان شالله راح تكون لي مشاركة في مدونتج مدونة الموضه لول

    تحياتي ولا تقطعينا

  30. للاسف هالوضع فكل مكان

    حتى البنيه اللي مب محتاية لشي واللي اهلها ماشاء الله عليهم مب مقصرين وياها

    تلقاها فالمولات وعند الشباب فمواترهم !!!

    والله وحتى فنص رمضان !!!

    غلاء المعيشة والفقر مب سبب للانحلال والضياع !!!

    وين الايمان والقرآن ؟؟؟

    وين الحيااااااااااااااااااااااااااااااء

  31. سالم الامــارات كتب:

    ابنة الاسلام

    تحياتي اختي وتسلميلي ع مرورج الطيب بعد طول الغيبة